Немеч му — мир пасьтала медся бура сӧвмӧм канмуяс пӧвстын. Йӧз лыд сертиыс сійӧ Рытыввыв Европаын медыджыд. Территорияыс да олысьяслӧн лыдыс ёна содісны 1990-ӧд воын, ГДР-кӧд йитчӧм бӧрын. Европалӧн суйӧрсайса канмуяс пӧвстысь Немечмулӧн медся уна суседыс.

Ывлавыв. Немечму нюжалӧ войвывсянь лунвылӧ. Ывлавыв гӧгӧртасъяс серти да мортлӧн наӧн вӧдитчӧм серти сійӧ абу ӧткодь. Мыйӧн ылӧджык лунвылӧ, сійӧн джуджыдджык лоӧ интасыс (местаыс).
Войвылын куйлӧ Немечму войвывса увтасін. Тані коркӧ вӧлі саридз, сыысь кольӧма кыз неджӧг пуксьӧсъяс. Морена мылькъяс костын куйлӧны кыссян йиӧн артмӧдӧм неыджыд тыяс. Васӧд климат дырйи артмылӧма уна нюр, но ӧні кежлӧ найӧс ставнас косьтӧма, на пыдди шыльквидзӧны видзьяс да гӧрӧм муяс. Саридздорса небыд климатысла да тшӧкыда усян енэжваысла бура быдмӧ турун. Тані скӧт видзнытӧ зэв лӧсьыд. Сук туруна видзьясын йирсьӧны мӧс стадаяс.
Канмулысь ыджыд юкӧн босьтӧны вӧръясӧн вевттьӧм, шӧр джудждаа гӧраяс, найӧ зэв мичаӧсь. Гӧраясыс важдыр кадсяӧсь, плавкӧс либӧ юр кодь йывъясаӧсь. Шӧр джудждаа слудаяс тэчӧма гранитӧн, гнейсӧн, лыа изйӧн, извесьт изйӧн да торйӧдӧма паськыд ковтысъясӧн. Плавкӧс гӧра йывъяссянь позьӧ аддзыны улын куйлысь ковтысъяс, чурвидзысь сьӧд кыртаяс. Нюръясысь петӧны уна лыда шоръяс, найӧ визувтӧны пуяс костті да кӧнсюрӧ, шыльыд креж вывсянь усигӧн, артмӧдӧны ичӧтик борганъяс. Гӧравыв пӧскӧтинаясын йирсьӧ скӧт, а гӧран муясын йӧзыс быдтӧны рудзӧг, зӧр да картупель. Зэв мича гӧра массивъясын сэн и тан лӧсьӧдӧма ывла доръянінъяс да войтырлы гожся шойччанінъяс.
Немечму лунвыв юкӧнсӧ босьтӧны Альпъяслӧн войвыв мусюръяс да налӧн гӧраводзьяс. Войвыв Альпъяс абу джуджыдӧсь, сӧмын торъя йывъясыс кайӧны 3000 метра вылнаӧдз. Альпъяс гӧраводзын медбура кольӧма вӧрӧдлытӧм вӧр-ва, сійӧс видзӧны ывла доръянінъясын да войтыр паркъясын.
Канму ыджыдджык юкӧнын климатыс вуджана — саридздорсасянь континентвывсаӧдз. Ывла сямыс сетӧ позянлун быдтыны быдсикас культура, а Рейн вожын — весиг винатусь. Енэжваыс быдлаын усьӧ уна, гӧраясын 600–800 мм-ӧдз.
Юяс Немечмуын тырыс, найӧ визувтӧны медсясӧ лунвывсянь войвылӧ. Медгырысь да медмича ю — Рейн. Сы вывті грузсӧ кывтӧдӧны-катӧдӧны миллион тоннаясӧн. Ю вомъясын сулалӧны ыджыд карса портъяс. Канму рытыв-лунвылын Дунай юлӧн панасыс. Рейн да Дунай торъя уна вааӧсь тулыснас, а гожӧмнас — гӧравыв лым да йи сылӧм дырйи.
Вӧръясыс кольӧмаӧсь этшалаӧ. Найӧ босьтӧны канму пасьталысь матӧ нёльӧд пайсӧ да тшемвидзӧны медсясӧ гӧраясын. Унджыкдлаын морт ки помысь артмӧдӧм ландшафтъяс. Индустрияса вывті уна уджаинысла, туйяс, каръяс да сиктъяслӧн тшӧкыд вез вӧсна сынӧд да ва ёна няйтӧсьмӧны. Юяс нуӧны няйт да пагӧдан васӧ

Войвыв саридзӧ. Юяслӧн да тыяслӧн уналун вылӧ видзӧдтӧг, дуб ваыс оз тырмы.
Канмуын олысь йӧз. Войтырсикас серти Немечмуын олысьяслӧн тэчасыс зэв ӧтсяма. Олысьлӧн пӧшти 100% — немечьяс, кывъяслӧн герман чукӧрса войтыр. Мирса мӧд тыш бӧрын Немечмуӧ мукӧд канмуясысь вӧлі вуджӧдӧма овны 9 млн. гӧгӧр немеч. Кыдз и Прансузмуын, тані суйӧрсайса уна уджалысь. Олысьлӧн пӧшти 90% олӧ каръясын.
Немечму — мирса медозыр канмуяс пиысь ӧти. Канму овмӧсын медшӧрыс — промышленносьт. Фабрик-заводыс эм быдлаын. Сэні вӧчӧны быдсикас прӧдукция. Торъя уна лэдзӧны машинаяс. Машина стрӧитан да химия заводъяс нималӧны мир пасьтала. Химия тӧваръяс, автомобильяс, радиоэлектроникаысь вӧчӧмторъяс ыджыд лыдӧн петкӧдӧны мукӧд канмуясӧ. Порта каръясын вӧчалӧны саридзвыв суднояс. Немечму озыр из шомӧн, калий совъясӧн. Торйӧн нималана Рурса из шом перйысь бассейн. Унджык сырьё, медводз кӧ — мусирсӧ, лоӧ вайны суйӧр сайысь. Аслас индустрия сӧвмӧмӧн торъялӧ Рур обласьт.
Видз-му овмӧсын медшӧр уджыс — скӧт видзӧм, кодлы зэв лӧсялӧ ывлавыв гӧгӧртасъяс, а быдмӧг вӧдитӧмыс могмӧдӧ скӧтсӧ сёянӧн. Кӧдзӧны сю, зӧр, сёян турунъяс. Альпвывса сук туруна видзьясын, кыдз и мукӧдлаын канму пасьтала, видзӧны йӧла мӧс стадаяс. Быдлаын рӧдмӧдӧны порсьясӧс. Медшӧр сёян культура — шобді. Сійӧс мыйтакӧ вайӧны и мукӧд канмуысь. Немечму рытыввылын да асыв-лунвылын, кӧні гожӧмыс шоныдджык, быдтӧны сакара свеклӧ. Видз-му овмӧсыс тӧдчӧ войтырлы муса сёян-юан вылӧ. Сійӧ нималӧ ас калбасъясӧн да сосискиӧн.