Азия — зэв ыджыд му юкöн; сiйö босьтö коймöд юкöн гöгöр став косiн веркöссьыс да дас кыкöд юкöн став мушар веркöссьыс. Лунвылын сылöн Малакка кöдж пöшти воö экваторöдз, а Малайя архипелаг пырö 11° вылö лунвыв мусярджынйö, сiйö лоö быттьöкö Австралияö вуджан поскöн. Войвылын Челюскин нöрыс сöмын 12°-öн оз во Войвыв полюсöдз, а Войвыв Мулöн дiясыс воöны полюслань нöшта на матöдз.

Кор Сингапур карын, кодi сулалö Азия лунвыв пом бердса дi вылын, тулысын лун шöр кадын шондi сулалö веськыда юр весьтын — зенитын, сэки Челюскин нöрысын сiйö тыдалö дзик енэжтас дiнас.

Кор Босфор вадорын лоö лун шöр кад, сэки Дежнёв нöрыс вылын 10 час рыт нин.

Асыввылын Дежнёв нöрыс воö зэв матöдз Америка дiнö, и тöлын Беринг висса йи вывтi позьö понъясöн вуджны Азияысь Америкаö öти лунöн. Рытыввылын Ичöт Азия кöдж воö матöдз Балкана кöдж дiнöдз, кодысь Азияöс торйöдöны саридзьяс — Эгей да Мрамор — да векньыдик висъяс — Дардан да Босфор; Босфорлöн пасьтаыс неыджыд — 600-сянь 3500 м-öдз.

Европакöд Азия öтлаасьö топыда.

Вежтассö на костын нуöдöны Из гӧраясöд асыввывла дорöдыс, Урал ю кузя да Кума-Маныч лажмалöмöд.

Африка дiнöдз Азия сiдзжö воö зэв матö. Суэц канал, кодöс кодйöма Суэц вуджанiн вомöн, сöмын 100–130 м пасьта, Баб-эль-Мандеб — араб ногöн «синва öдзöс» — вислöн пасьтаыс 37 км.

Кык боксянь Азияöс кытшалöны кынмывтöм океанъяс; коймöд боксянь — рытыввывсянь сы бердö воöны саридзьяс коймöд океанлöн — Атлантикалöн. Войвылын Азияöс кытшалö Войвыв Йиа океан.

Вадор визьыс Азияын озджык кытшлав, кыдзи Европаын; кöджъяс да дiяс танi босьтöны витöд пайсö став мутассьыс. Саридзьяс омöля пырöны материк пытшкас; танi эмöсь районъяс саридзсянь 2 сюрс км сайын дай ылынджык. Но саридзьяс да куръяяс вель ёна жö пырöны Азия вадоръясö, торъя нин асыввыв вадоръясö.

Войвылын Азиялöн куим кöдж: Ямал, Таймыр да Чукотка; Войвыв океан артмöдö саридзьяс: Кара, Лöпта, Асыввыв Сибырса да Чукотка. Таймырсянь войвывланьын куйлö Войвыв Му архипелаг, а асыввылын Таймырсянь — Выль Сибырса дiяс, Врангель дi. Азиялысь асыввыв вадоръяссö кытшалöны Лöнь океанса саридзьяс: Беринг, Оката, Мупомса, Виж, Асыввыв Китайса, да Лунвыв Китайса саридзьяс.

Лунвылын Азияысь ми аддзам куим ыджыд кöдж: Аравия, Индостан да Индокитай; асыввылын — Камчатка да Корея, рытыввылын — Ичöт Азия. Таысь öтдор, Азияса вадоръясын эмöсь уна дiяс. Асыввывтi найö артмöдöны сикöтш моз нюжалан лёдзъяс; сэнi медся гырысь дiяс — Курила, Мупом дiяс да Сахалин, кодöс торйöдö материкысь Тотара вис; асыв-лунвылын — Тайвань дi да Пилиппинса дiяс, мирас медся ыджыд Малайя архипелаг, кытчö пырöны ыджыд дiяс: Борнео, Суматра, Калимантан, Ява, кодъяс шусьöны Сунда дiясöн.

Азия лунвылын — Индия океан; сылöн саридзьяс — Аравия да Гöрд, куръяяс — Бенгал да Перс. Индостансянь лунвывланьын — Шри Ланка (Цейлон) дi, а Ичöт Азиясянь лунвывланьын — Кипр дi. Азиялöн доргӧгӧр визьыс зэв сибыд вадорса канмуяс костын öта-мöдкöд саридз вывтi волысьöмлы, а сiдзжö и мукöд му юкöнъяскöд волысьöмлы. Асыввыв вадоръясыс Азиялöн йитчöны лунвыв вадоръяскöд Малакка да Сунда висъясöн, а лунвыв вадоръясыс Азиялöн рытыввыв вадоръяскöд да став Европакöд — Баб-эль-Мандеб вискöн да Суэц каналöн. Австралиякöд да Африкакöд Азия йитчö Индия океан вывтi мунан туйясöн, а Америкакöд — Лöнь океанса туйясöн. Панама канал пыр мунö мöд туй, кодi йитö Азияöс Европакöд.

Колö шуны, мувыв куйланiныс Азиялöн бур, но абу, дерт, Европалöн кодь, сы вöсна мый Азия куйлö Атлантика океанса тöдчана саридзвыв туйясысь бокын.