Коми Республикаыдлöн муыс, аслыспöлöс тэчасысла да сы весьтса сынöдлöн вывтi улис сямысла, веркöстi да пытшкöстiыс лоöма вель уна ваа.

Кызвын юыс визувтö ньöжмыда, муувса ваыд матын веркöссяньыс, а асыв-войвылын муыс пыр кын пытшкöса дай зэв кадъя. Кыссян йи сылiгöн да сывтыын артмöдалöм тшöтшкöс, омöля косьмана быдпöлöс шыльыдiн да увтасыс лёка нюрсялöмаöсь: став нюрыслöн пасьтаыс танi 1,5-1,8 сюрс км²-öдз. Шöркодяс жö кадъя муыд республика улын лоö 9,4%, эськö мукöд ю вожас содö и 40-80%-öдз-а.

Уна лыда ва визулыд петö медсясö кыпалан мувывторъясысь, ёнджыка кымöрсянь кöтöдан инъясысь, а сэсся нин ыджыд ю везйö öтлаасьö.

Медыджыд юыс республика муад ― Печӧра (кузьтаыс 1809 км, ва öктанiн ― 327 сюрс км² ыджда). Европа войвылын сiйö медся уна ваа (во чӧжӧн шöркодя видзöмыс ю вомас ― 4120 м³/с). Печöралысь медгырысь вожсö ― Усваöс (к. ― 654 км, ва öктö ~100 сюрс км²-ысь) уна вааöн жö лыддьöны: вочӧжся шöркодьнас видзöмыс ~1500 м³/с). Нöшта кык тöдчана юыс ― Эжва (1130 км; 123 сюрс км²; 1100 м³/с ю вомас, 600 м³/с Сыктывкар весьтас) да Мозын (966 км; 76 сюрс км²; 600 м³/с ю вомас) сöмын катыданыс визувтöны Коми Республика му кузяыд. Мукöд ю йылысь кö гарыштны, матö 40-ыслöн кузьтаныс 200-600 км-öн, ва öктанiнныс 300-2000 км² ыдждаöн. Нöшта 3300 юыс 10–200 км кузьтаöсь, а 10 км-ысь дженьыд шор-ёльтö уна дас сюрсöн нин арталöны.

Печӧра саридзö ваыс петö республикаса 62% мувывторсьыс (Печöра ю пырыс), Еджыд саридзö (Эжва да Мозын пырыс) ― 37%-ысь, Каспи саридзö (Ветъю да Кама вожъяс пырыс) ― куш 1% мувывторсьыс.

Сибыр Изъяс вылын, а мукöдлатi и Тиман вылын юясыд нёриняöсь, унаöн коськаöсь, кытсюрö потас кодь ковтысаöсь.

Тшöтшкöс жö му кузяыс унджык юыд визувтöны лöня, ковтысныс паськыд, ворганыс ёна чуклялö, уна вис, полой да тыкöла артмöдалö. Ва юкан визьсö татшöм юяс костысь он и казяв.

Коми Республика муын выйим 78 сюрсысь унджык ты. Эськö веркöсныс, öтув босьтан кö, лоö 4,5 сюрс км² ыджда-а, быд сё пиысь сöмын кыкыслöн рöмпöштаныс 0,5 км²-ысь паськыд.

Пукалöны тыясным тундраын и керöс вылын, пармаын и адз вылын. Артмöмаöсь найö тшöтш быд ногыс. Мукöдыс кыссян йиöн кырлöм инö кольöма, мукöдыс сывдöм кынмуö, момга вылö ли пуксьöма, эмöсь и важъя саридзлöн колясъяс.