Став гырысь юясыс Африкалöн пансьöны сэтшöм местаясын, кöнi усьö уна енэжва, визувтöны найö джуджыд платоясöд, туй выланыс паныдасьöны тшупöдъяскöд, сы понда вöчöны уна коськ да борган.

Медся тӧдчана юыс Африкаын — Нил, кузьтанас сiйö сетчö сöмын Миссисипилы Миссурикöд. Сiйö артмö Еджыд Нилысь да Лöз Нилысь. Еджыд Нил петö Виктория тыысь, кодлöн тшупöдыс километр дорысь вылынджык океан веркöсысь. Лöз Нил заводитчö Эфиопия керöсъясын Тана тысянь, кодi куйлö нöшта вылынджык Виктория ты серти. Мушöр саридзлань визувтiгöн Нил паныдасьö тшупöдъяскöд да вöчö уна коськ. Сы бöрын Нил визувтö лöня да саридзö усянiнын Египет мутасъясын вöчö дельта, ыджда сертиыс Волга дельта кодь кымын.

Гожöмын Нил быд во ойдö вывтi ёна зэрöмысь заводитчанiнас.

Тайö зэръясыс заводитчöны тулысын да мунöны гожöмбыд. Кыкнан Нилыс — Еджыд и Лöз — туöны да нуöны гудыр ва ылö войвылö, кöнi зэръяс ньöти оз овлыны, да кöнi юыс ойдö гожöмын, мича, кос да жар поводдя дырйи быттьöкö некутшöм помкатöг. Арнас юыс бöр пырö аслас воргаö, ковтысас кольö улис да видз-му овмöслы шогман нюйт пöвст.

Кузьта сертиыс мöд ю Африкалöн — Конго. Сiйö нуö сэтшöм уна ва, мый пасьтаыс сылöн шöр юкöнас 10 км гöгöр. Но, кöнi сiйö паськöдчö океанлань кыпалöм материк вомöн, сэнi Конго векнялö 400 м-öдз да визувтö коськъяс пыр джуджыд, чуклясян сёртасöд 50 км-öн час.

Коймöд ю Африкалöн — Нигер — Нил серти ыджыдджык ваа, но Конгоысь ёна бöрö кольö.

Мукöд ыджыдджык юяс Африкаын — Замбези Виктория нима борганöн да Оранжава.

Замбези ю шöр юкöнас визувтö базальт пыдöсöд, важ кынмöм лава вывтi, туй вылас паныдасьö потаскöд да усьö 120 м судтасянь. Борганыслöн шумыс кылö 15 км сайсянь. Борган весьтас пызйö-кайö ваыс вылöдз, сэнi шондi ворсö öшкамöшка быдсикас рöмъясöн.

Асыввыв Африкаса тыяс — Ньяса, Танганьика, Виктория, Альберт да мукöд — куйлöны джуджыд лайковъясын, вадоръясыс налöн джуджыдöсь да зэв зöмöсь. Медыджыд тыыс Африкалöн — Виктория, ыджда сертиыс сетчö сöмын öти дуб ваа тылы — Катыдсалы Америкаын. Но Викторияыд — ляпкыд ваа ты.

Суданланьын эм сöмын öти ыджыд ты — Чад, но сэсянь оз пет некутшöм ю; сэтчö усьö Шари ю.

Сахара войвыв помын, а сiдзжö Атлас мусюръяс костын, эмöсь сола тыяс — шоттъяс, кöнi ваыс овлö сöмын зэръяс бöрын, мукöд кадъясö жö шоттъяс пыдöсын куйлö лым кодь еджыд сов.