Лунвыв Африкалӧн канмуяс. Лунвыв Африкаса республика. 

Лунвыв Африка босьтӧ материклысь векниджык юкӧнсӧ, коді куйлӧ Конго (Заир) да Замбези юяс ваюксянінсянь лунвылын. Лунвыв Африкаса тшӧтшкӧс вывтасыс шӧр юкӧнас ляпкалӧ, лайколас куйлӧ Калахари джынвыйӧ овтӧмин. Доръяслань тшӧтшкӧс вывтасыс вочасӧн кыптӧ, а асыввылын вуджӧ Гундыр гӧраясӧ. Дзик лунвылын дӧввидзӧны кӧрӧмӧн артмӧм Кап гӧраяс, найӧ неуна томджыкӧсь Лунвыв Африкаса став мукӧд юкӧн дорысь. Лунвыв Африкалысь ыджыдджык юкӧнсӧ босьтӧны саваннаяс. Васӧдлуныс абу быдлаын ӧткодь да, саваннаяс зэв унапӧлӧсаӧсь.

Лунвыв Африкаса Республика (ЛАР) куйлӧ материкас дзик лунвылын. Канму пырӧ мирса сӧвмӧм странаяс лыдӧ. Юркарыс — Претория кар.

Канмуын унджык олысьыс — банту вужвойтыр. Мукӧд африкаса канмуясысь ЛАР-ыс торъялӧ сійӧн, мый сэтчӧс йӧз пиын ыджыд пай — коркӧ Европаысь локтӧм йӧз (африканеръяс да англичана).

ЛАР — быдпӧлӧс ывлавыв комплексъяса да гырысь ывлавыв озырлунъяса канму. Страналӧн ыджыдджык юкӧныс — тайӧ тшӧтшкӧс вывтас, коді вочасӧн тшупӧдъясӧн кайӧ лунвывлань да асыввывлань, бӧръяпом вуджӧ гӧраясӧ. Канму территориясӧ кызвыйӧ вевттьӧны саваннаяс. Ывлавыв гӧгӧртасъяс, кыдз и став Лунвыв Африкаын, вежсьӧны оз сӧмын войвывсянь лунвылӧ, но и асыввывсянь рытыввылӧ.

Ландшафтъяслӧн унапӧлӧслун вӧсна ЛАР зэв озыр пемӧсуловнас. Уналаын кыйсьӧм да чери кыйӧм ӧнӧдз на лоӧ татчӧс олысьяслӧн медшӧр уджӧн. Но европеечьяс локтӧм бӧрсянь вӧлявыв пемӧсъяслӧн лыдыс тӧдчымӧн чинӧма, а уна сикасныс пӧшти бырӧма. Торъя нин чинӧмаӧсь турун сёйысьяс — антилопа, зебра, жираф, слӧн, ыджыд сьӧд буйвол, сюраныр. Пӧшти дзикӧдз бырӧма лев, леопард.

Медым дорйыны дзикӧдз бырӧдӧмысь вӧлявыв пемӧсъяссӧ, а сідзжӧ ывлавыв комплексъяс видзӧм могысь ЛАР-ын лӧсьӧдӧма ывла доръянінъяс да войтыр паркъяс. На пӧвстысь медся ыджыдас — Крюгер нима войтыр паркӧ — чукӧртӧма материкын олысь став сикас пемӧсъяссӧ.

Странаса бура чужтан мусинма интасъяс еджыд фермеръяс киынӧсь — найӧ асторъя видз-му уджаин кутысьяс. Фермеръяс паськыда вӧдитчӧны овмӧсаныс техникаӧн да му вынсьӧданъясӧн и та вӧсна босьтӧны ыджыд урожай. Найӧ быдтӧны кукуруза, шобді, пуртӧса быдмӧгъяс, сакара тростник, цитрусъяс, хлопчатник да мукӧд культура. Бур пӧскӧтинаа вывтас платоясын лӧсьӧдӧма ыжъяс да сюра гырысь пода быдтан фермаяс. Лудын йирсян пемӧсъяс видзӧм видз-му овмӧсын босьтӧ медтӧдчана ин.

ЛАР зэв озыр быдпӧлӧс мупытшса перъянторъясӧн. Геология шемӧсӧн нимтӧны тайӧ канмусӧ. Алмазъяс, зарни, платина, уран да кӧрт руда куйлӧдъяс серти да тайӧ озырлунсӧ перйӧм серти ЛАР-ыс мирын медводдзаяс пӧвстын. Канмулӧн овмӧс англияса да америкаса монополистъяс кипод улын. Найӧ юралӧны мупытшса озырлунъяс перйӧмсӧ да босьтӧны таысь уна сьӧм. 
Канмуын уна фабрик-завод, ӧдйӧ сӧвмӧ индустрия.