Америкаöс европеечьяс кыкысь восьтылiсны. Медводз сiйöс восьтiсны Х-öд нэмын саридзвуджысь норманнъяс, кодъяс овлiсны Скандинав кöджын. Выль муяс корсьöм могысь найö неöтчыд уявлiсны ылi туйö да сiдзи восьтiсны (аддзисны) Гренландия, а сэсся и асыввыв вадорсö Войвыв Америкалысь, кодöс найö шуисны «Виноград муöн». Но тайö восьтöмсö норманнъяс эз лыддьыны кутшöмкö ыджыд коланаторйöн да регыд сы йылысь асьныс вунöдiсны.

Мöдысь Америкаöс восьтöма XV нэм помын италияса Коломбо. Сiйö, сэк кадся мукöд морякъяс моз жö, кöсйöма корсьны саридзвыв туй Индияö. Тайö колö вöлi паськалысь вузасян капиталлы. Коломбо пырис Испанияса сарлы кесъялöмö да мöдöдчис 1492-öд вося август воддза лунъясö Атлантика океан вывтi рытыввылö; сiйö воас жö йирым тöлысь помын Коломбо сувтöма Багама дiяс пытшкысь öти дi дорö. Сы бöрын восьтiс нöшта Куба да Гаити, сэсся бöр воис Испанияö, вайис бур юöр: саридзвыв туй Индияö сюри (Коломбо мöвп сьöртi восьтöм дiясыс сулалöны Индия бердын, а Куба дiöс сiйö чайтiс Мупомöн).

Бöрынджык сiйö вöчис нöшта куим саридзвыв ветлöм, восьтiс уна выль дiяс, а сiдзжö и асьсö Америка материксö, но сiйö пыр чайтлiс, восьтöм муясыс пö Асыв-Лунвыв Азияынöсь. Татшöм мöвпöн Коломбо и кулi, а европасаяс дыр шулiсны сылысь восьтöм муяссö Индияöн, бöрынджык — Вест-Индияöн (Рытыввыв Индияöн).

Сöмын ветлысь-мунысьяслöн унаысь уявлöм бöрын европасаяс гöгöрвоасны: Коломбо тай восьтöма выль му юкöн. «Америка» нимсö сылы сетöма вöлi öти ветлысь-мунысь ним серти — Америго Веспуччи серти, кодi гижалӧма Америкасӧ.

Америка туялöмын Коломбо бöрын медгора нимöдöм лоö Испанияса саридзвуджысь Магелланлы; мушар гöгöр кытшовтiгöн (йöз пöвстысь му гöгöр медводдзаöн ветлiгкосттi) сiйö гöгöртiс Лунвыв Америкаöс сы нимöн шуöм вис кузя да сэсся аддзис, мый Америка да Азия костын куйлö зэв ыджыд океан, кодлы сiйö сетiс «Лöнь океан» ним.

Войвыв Америкалысь вадоръяссö туялiсны Англияса саридзвуджысьяс: Дэвис, Гудзон, Баффин да мукöд (на нимöн шусьöны Дэвис вис, Гудзон куръя, Баффин куръя да мукöд). Öткымын ветлысь-мунысьяс мöдлiсны мунны Атлантика океанысь Ыджыд океанö Йиа Вой саридз пыр, но воштöмаöсь олöмнысö гӧвкъялан йияс пöвстын тшыгла да кöдзыдла. Тадзи, шуам, кулöма XIX нэмын Франклин, аслас став ёртъясыскöд.

Сöмын ХХ-öн нэм пуксигöн норман ветлысь-мунысь Амундсенлы мойвиис паруса-мотора шхуна вылын мунны Америка вадоръяс пöлöн Дэвис виссянь Беринг вискöдз, та вылö ковмис сылы куим во. Пытшкöсса мутасъяссö Америкалысь, кыдзи Войвылысь, сiдз жö и Лунвылысь, туялiсны медъёнасö Европаысь локтöм йöз; туялысьяс пытшкысь торйöн уна вöчöма ветлысь-мунысь немеч Александр Гумбольдт, кодi тыр-бура гижалiс Лунвыв да Медшöр Америкалысь ывлавывсö.