Ыджда сертиыс Америка сетчö сöмын Азиялы. Барров нöрыс войвывсянь Горн нöрыс лунвылöдз сiйö кыссьö 15 сюрс км кузьта.

Америка куйлö медся тöдчана кык океан костын. Мукöд материкъяссянь сiйö ылын либö весигтö зэв ылын, но та пыдди Америкасянь мунöны сэтчö веськыд туйяс восьса океанъясöд. Сiдзсö, öти нырднас Америка матöдз воö Азия дiнö, но сiйö местаас олö этша йöз.

Америка тэчöма кык материкысь, кодъяс вель ёна торъялöны асланыс ывлавыв серти. Вадор визьыс Америкалöн абу быдлатi öтсяма. Лöнь океан вадорыс сылöн омöля торъявлöма, сэнi эм сöмын кык ыджыдджык кöдж — Калифорния да Аляска, кодлы нюжалöмöн лоöны Алеут дiяс — да сöмын öти ыджыдджык куръя, векньыд да кузь — Калифорния. Лöнь океан пöлöн америкаса вадоръяс уналатi джуджыдöсь, кыртаöсь, бухтатöмöсь.

Сöмын 47-öд параллельсянь 60-öд параллельöдз Войвыв Америкалöн вадоръясыс вундассьöмаöсь фьордъясöн, да матiгöгöрас эмöсь дiяс да шхераяс, Скандинав кöджын моз жö. Öти татшöм фьордын сулалö порт Ванкувер. Та коддьöм фьордъяс, дiяс да шхераяс ми аддзам Лунвыв Америкаын, 42-öд параллельсянь лунвывланьын.

Магеллан вис, кодi торйöдö материкысь Биа Му дi, сiдзжö тэчöма некымын фьордысь. Сiйö сэтшöм чукльöсь, мый Магелланыслы öдва сюрис сэтысь петан туй. Кузьтаыс сылöн 500 км.

Атлантика вадорыс Лунвыв Америкалöн омöля торъявлöма; сэнi эм сöмын кык ыджыд бухта, кыкнаныс ю вомъясын — Ла-Плата да Амазонка ю вомясын.

Атлантика вадор Шöрвыв да Войвыв Америкалöн зэв ёна торъявлöма. Сэнi эм ыджыд дi чукöр — архипелаг, шусьö Вест-Индияöн. Сэтчö пырöны Ыджыд Антила дiяс (Куба, Ямайка, Гаити, Пуэрто-Рико), Ичöт Антила дiяс да Багама дiяс.

Тайö архипелагыс Флоридакöд тшöтш торйöдö океанысь америкаса Мушöр саридз, кытчö пырöны Мексика куръя да Караиб саридз. Татысь ю сяма визулöн петö Флорида вискöд Гольфстрим; пасьтаыс сылöн танi 50 км гöгöр, визув öдыс — часöн 10 км гöгöр.

Асыввыв вадорыс Войвыв Америкалöн ёна торъявлöма 35-öд параллельсянь 50-öд параллельöдз, кöнi уна куръяяс да бухтаяс да кöнi сулалöны портъяс — Нью-Йорк, Филадельфия да мукöд. Медыджыдыс тайö куръяяссьыс — Вежа Лаврö, кодi рытыввывсянь пожъялö Ньюфаундленд дiöс.

Войвыв вадор Америкаыслöн ёна торъявлöма. Сэнi пыдöдз материкас пырö Гудзон куръя; океанкöд сiйö öтлаасьö Гудзон вискöн. Найö кытшалöны Лабрадор кöдж.

Войвылын Америкаöс гöгöртö зэв ыджыд архипелаг, шусьö сiйö Канадасаöн, а сiдзжö Полюсдорсаöн, сэнi уна гырысь дiяс, на пытшкысь Баффин Муыс Суматраысь ыджыдджык. Дэвис вис да Баффин куръя торйöдöны тайö архипелагсö му вылын медся ыджыд дiысь — Гренландiысь.

Канадаса архипелагын дiяс костса висъяс дыр кежлö тупкысьлöны йиöн, а мукöдыс на пытшкысь, Атлантика океанысь Йиа Вой саридзӧ петан туйяс, пöшти пыр тырöмаöсь йиöн.

Полюсдорса архипелагсянь рытыввывланьын Йиа саридз вывтi Америка вадоръясын судноясöн позьö ветлыны сöмын дженьыдик кадö да и сiйö не быд во. Беринг вис во джын дорысь дырджык кадсö сiдзжö тырöма йиöн, но гожöмын сэтi ветлöны суднояс.

Колö шуны, саридзьяс оз сэтшöма пырны Америка материкö, кыдзи Европаын. Войвыв Америкаын и Лунвыв Америкаын эмöсь местаяс 1500 км сайын дай ылынджык океансянь. Но ас шöр юкöнас Америка ёна векнялö: Панама вуджанiнлöн пасьтаыс сöмын 60 км, и сы пыр нуöдöма Панама канава.

Уджъяс карта вылын. Петкӧдлӧй Америкалысь помъяссӧ войвылысь да лунвылысь. Тӧдмалӧй налысь коластсӧ экваторсянь (километръясӧн). Мурталӧй медся паськыдінсӧ Лунвыв Америкалысь параллель кузя. Думнаныд вӧчӧй саридз вылӧд путешествие Войвыв Америка гӧгӧр Гудзон куръясянь часі ньӧвъёсь мунӧмланьӧ Панама канава пыр Беринг вискӧдз да висьталӧй став куръяяс, висвъяс, саридзьяс, саридз визувъяс, ляпкыдінъяс, діяс да кӧджвъяс тайӧ туй вывсьыс. Вӧчӧй татшӧм жӧ путешествие Лунвыв Америка гӧгӧр.