Урал гӧраяс нюжвидзӧны Коми Республика асыввыв суйӧр пӧлӧн. Важ комияс шулӧмаӧсь Уралтӧ Сибыр Изйӧн либӧ дженьыда Изйӧн. Коми му вылӧ рытладор баннаныс дзоргӧны полюсдорса, полюскытшса да войвыв Изъясыд. Сибыр Изйыд быд ног кӧрлӧмӧн артмалӧма сёр пальӧзой кадӧ. Сэсся сійӧс вӧлі ёнакодь кырлӧдлӧма да бара на кыпӧдалыштӧма выльджык кадколастъясӧ.

Тэчӧма Изсӧ медсясӧ ордовик кадӧдз на пӧртчӧмӧн артмӧм лонысь да кварсытысь, а таысь ӧтдор бисир моз ыльӧбтылӧм му рӧдъясӧн и.

Пӧрым водзвылын чужлӧм томджык му рӧдсьыс, Пальӧзой кадӧ жӧ эськӧ-а, тэчалӧма и Сибыр Из пӧлӧн нюжвидзысь мылькъя Пармаяс (500-700 метраӧн джудждаӧсь) да буракодь нюрсялӧм паськыд ковтысъяс.

Сибыр Из горувтi извесьт изйысь ли гипсысь вöчлöм пöвстъяссö кытсюрö сывдылöма-нуöма ваöн. Сiйöн татчöс му пытшкас артмалöма уна гырк. Татшöмыс тай Унья дорын и, Печöра йылын и, Ылыдз бердын и тырыс да.

Му вылысь сывлытöм йиыд öнi кызвыннас Полюскытшса Из вылын пукалö.

Сэнъясöн жö зымвидзö и Сибыр Изъяс пӧвстын медся джуджыдыс ― Народа (1894 м).