Индустрия. Австралияса овмӧсын зэв ыджыд роль ворсӧ промышленносьт, кӧні бура сӧвмӧма став юкӧныс. Австралияын эм унапӧлӧс мупытшса перъянтор, та вӧсна тані котыртчӧма мупытшса озырлун

перъян индустрия. Сідзжӧ тайӧ канмуас ыджыд ӧдӧн сӧвмӧ машинавӧчӧм, химия индустрия, сёян-юан вӧчӧм (йӧлысь, яйысь, градвыв пуктасысь, фруктъясысь).
Нӧшта рытыввыв Австралияын перйӧны зарни да эзысь; Квинслендын да Выль Лунвыв Уэльсын — из шом; из шом петкӧдан медшӧр порт — Ньюкестль (Сиднейсянь матын, войвывланьын).

Видз-му овмӧс. Тайӧ юкӧныс тшӧтш бура сӧвмӧма. Фермеръяс киын зэв ыджыд му участокъяс.
Торъя нин паськалӧма ыж видзӧм. Ыж видзӧм мойвиис паськӧдны Австралияын артезиан юкмӧсъяс уналаын вӧчӧмӧн. Татшӧм юкмӧсъяссӧ кодйӧма уна сюрсъясӧн; быд юкмӧс сетӧ зэв уна ва; ваысь локтӧ мупытшса ва лэдзан слӧйясӧд гӧра бокъяссянь, уна дас дай сё километръяс сайсянь. Вӧдитӧны сэні «вуруна» да «яя» ыжъясӧс. «Вуруна» ыжъяс, — зэв кузь да небыд гӧнаӧсь, вӧдитӧны косджык местаясын, а «яя» ыжъясӧс васӧдджыкинъясын. Вурун — медшӧр петкӧдантор Австралияысь, и австралияса вурун — став му выв вурунысь джынйыс.
Васӧдджык климата интасъясын, торъя нин асыввыв вадоръясын Австралияын вӧдитӧны уна гырысь скӧт, — мыйкӧ мында йӧла скӧт, но медзэвсӧ яя скӧт, торъя нин Квинслендын, кӧні гӧра бокъясас эмӧсь уна бур пӧскӧтинаяс.
Став асыввыв берег пӧлӧныс паськалӧма шобді да маис вӧдитӧм.
Австралияса овмӧсын зэв ыджыд роль ворсӧны саридзьяс. Сэтысь кыйӧны чери, быдтӧны-паськӧдӧны моллюск-вӧсьӧ ракпаньяс, устричаясӧс.