Австралия — абу джуджыд материк, вевдорсяньыс сійӧ вевттьысьӧма горизонт нога либӧ омӧля ньывкӧс пластъясӧн, кодъяс куйлӧны кӧрӧмӧн артмӧм да сэсся киссьӧм важ гӧраяс веркӧсын. Став рытыввыв Австралияыс — кристалл массив, коді вылыссяньыс вевттьысьӧма лыа из да извесьт из слӧйясӧн и вид сертиыс лоӧ ыджыд тшӧтшкӧс вывтас; сӧмын кӧнсюрӧ кайӧны негырысь массивъяс, либӧ паныдасьлӧны сола тыяса гуранъяс.

Шӧр юкӧнас Австралияын куйлӧ ыджыд Австралия Шӧрса увтас. Медся улын местаас сэні куйлӧ сола Эйр ты, коді 12 м-ӧн улынджык океан веркӧсысь.

Эйр ты — ляпкыдик сола няйт нюр, кодлӧн вадоръясыс ветлыны позьтӧм няйт; стӧч тӧдмавны тайӧ вадоръяссӧ позис сӧмын ероплан вывсянь.

Австралияын сӧмын асыввылас кыпӧдчӧны збыльвыв гӧраяс; шусьӧны найӧ Австралияса Кордильераӧн, а лунвыв юкӧныс шусьӧ Австралияса Альпъясӧн. Гӧраясыс тайӧ кӧть и кӧрӧмӧн артмӧмаӧсь, но зэв важӧсь, найӧ ёна нин киссьӧмаӧсь да шылялӧмаӧсь.

Рытыв бокъясыс налӧн ньывкӧсӧсь, а асыввылас тайӧ гӧраясыс крута помасьӧны океанлань. Тані му кышыс пуксьӧма (вӧйӧма) да сэки артмӧмаӧсь лӧсьыд бухтаяс. Австралияса гӧраяс, а на пӧвстын и Австралияса Кордильера, абу джуджыдӧсь, форма сертиыс европашӧрса массивъяс кодьӧсь: сэті кокниа позьӧ ветлыны да уналаын найӧс вомӧналӧмаӧсь кӧрт туйясӧн.

Му пытшкыс налӧн зэв озыр из шомӧн; сійӧ куйлӧ матын Сидней да Ньюкасл портъяссянь. Колян нэмын Австралияса Кордильераын россыпьясысь перйылісны зарни; сэні сюрлывлісны гырысь зарни шмакъяс, но ӧні тайӧ россыпьясыс бырисны нин. Та пыдди уна зарни аддзӧма Рытыввыв Австралия массивъясын; сэні эмӧсь ӧні зарни перъян приискъяс.