Австралияын вӧлявыв пемӧсъяс дзик мӧдсикасаӧсь мукӧд му юкӧнъясын серти. Сэні кольӧмаӧсь уна сэтшӧм пемӧсъяс, кодъяс овлісны войдӧр и мукӧд му юкӧнъясын, но важӧн нин пӧшти ставыс бырис. Австралияын ёна паськалӧмаӧсь зепта пемӧсъяс.

Оласног сертиыс мукӧдыс на пытшкысь миян турун сёйысьяс кодьӧсь, мукӧдыс — яйвыв пемӧсъяс, гут-гаг сёйысьяс кодьӧсь да с. в.; ыджда сертиыс мукӧдыс крысаысь абу ыджыдӧсь, эмӧсь — морт судтаӧсь.

Медся ёна паськалӧм зэптаяс — кенгуру. Найӧ лыддьысьӧны Австралияын уна дас породаӧдз, да олӧны сэні быдлаын. Ӧні гырысьджык кенгурусӧ ёна бырӧдӧны сы вӧсна, мый найӧ сёйӧны ыж пӧскӧтинаяс вылысь турун, а сідзжӧ и ку радиыс.

Австралияын эмӧсь на кольк вайысь нёньӧдчысьяс: ехидна да утканыр; веглясьысьяс да пӧткаяс моз найӧ вайӧны колькъяс, но колькъяссьыс петӧм пиянсӧ вердӧны йӧлӧн. Утканыр олӧ гуясын ю доръясын, сёянсӧ корсьӧ вадор нюйт пытшкысь.

Гыжа пемӧсъяс европеечьяс вотӧдз сэні нач эз вӧвны; эз вӧвны сідзжӧ и ӧблезянаяс. Яйвыв пемӧсъясысь ёна паськалӧма вӧлі йизьылан кадсянь на вӧлявыв пон динго. Тайӧ понйыс гӧн рӧмнас мунӧ руч вылӧ. Сійӧ служитлӧма войдӧр важ австралиечьяслы кыдзи джынвыйӧ гортса пемӧс, а ӧні ыж видзысьяслы вайӧ лёктор, баляпиян вылӧ усьласьӧмӧн.

Австралия вӧръясын да степъясын олӧ уна пӧтка, торъя нин попугайяс, кодъяс лэбалӧны уна сюрса кельӧбъясӧн.

Австралияса унджык лэбач эм сӧмын Австралияын; сэтшӧмӧсь: еджыд кутш, сьӧд юсь, лира кай, коді олӧ тропик вӧрын, бордтӧм страус эму, ыджда сертиыс ичӧтджык Африкасаысь да ыджыдджык Лунвыв Америкасаысь.

Квинсленд юясын олӧ кык ног лолалысь чери (цератодус), кодлӧн эм нёкчимыскӧд ӧтлаын сідзжӧ и ӧти ты.

Гортса пемӧсъяс Австралияын европеечьяс вотӧдз эз вӧвны, динго понмӧс кӧ не лыддьыны; но европеечьяс вайисны сэтчӧ ассьыныс став гортса пемӧснысӧ, да ӧні Австралияын зэв уна нин ыжъяс, сюра гырысь скӧт да вӧвъяс.