Австралияын вӧрыс этша, сэні медсясӧ овтӧминъяс да кустъяс тыра расъяс (149 серп.).

Сук васӧд тропик вӧръяс сулалӧны Выль Гвинея ді вылын. А Австралияын найӧ паныдасьлӧны сӧмын торъя участокъясӧн асыв-войвыв да мыйтакӧ войвыв вадор пӧлӧн, кӧні усьӧ торйӧн уна енэжва (151 серп.).

Омӧльджыка васӧд местаясын сулалӧ шочиник эвкалипта вӧр; тані пуясыс зэв гырысьӧсь. Татшӧм вӧрас туруныс зэв сук.

Саридз вадоръяссянь ылынджык, войвылын да асыввылын, а сідзжӧ рытыввылын, кӧні енэжваясыс усьӧны этшаджык, шоч вӧрыс вуджӧ кузь туруна саваннаясӧ; кос кадӧ туруныс косьмӧ (видзӧд 147 серп.). Турун пӧвстын сулалӧны ӧтка пуяс — эвкалиптъяс, акацияяс. Быдмӧ сідзжӧ сулея пу, коді аслас польдчӧм пучӧрас чукӧртӧ ва.

Австралия шӧрса кос, стоктӧм интасын эмӧсь джынвыйӧ овтӧминъяс да лыа да изъя овтӧминъяс. Овтӧминъясын быдмӧгъяс пӧшти абуӧсь. Сӧмын кӧнсюрӧ быдмӧны сутшкасьысь, лэчыд пурт кодь турунъяс.

Джнвыйӧ овтӧминъясын уна сё километръяс вылӧ кыссьӧны сука гартчӧм да пыр муннысӧ пӧшти ньӧти позьтӧм тільяс, кӧні быдмӧны пемыдрудов рӧма кос чуткасьысь куст чукӧръяс; войвылын найӧ медсясӧ артмӧмаӧсь ляпкыдик чуткасьысь акацияясысь, а лунвылын эвкалипт  кустъясысь. Австралияын татшӧм кустарник сяма тільясыс шусьӧны скрёбӧн.

Австралияын васӧд асыв-лунвылын лоӧны тропикувса вӧръяс, кӧні лианаяскӧд да пу кодь лудіктурунъяскӧд быдмӧны век веж сук эвкалипт пуяс.

Тайӧ вӧръясыс вуджӧны Тасмания ді вылӧ, кӧні сідзжӧ ёна паськалӧма лунвывса век веж бук.

Австралия рытыв-лунвылын быдмӧны эвкалиптъяс да мукӧд гырысь пуяс, кодъяслӧн кузьтаыс овлӧ 90 м. Пальмаяс, а сідзжӧ лианаяс да лудіктурунъяс танъясын пӧшти абуӧсь. Том вӧрын быдмӧны ляпкыдик кыз пучеръяса да кузь пучокъяса коръясысь «турун пуяс» да уна лыда век веж кустарникъяс.