Австралия вӧлі восьтӧма европеечьясӧн Америка бӧрын (восьтісны голландечьяс 1605ʼ воын). Голландечьяс сылы пуктісны ним Выль Голландия. Австралиялысь вадоръяс да Океаниялысь діяс туялӧмын медыджыд заслугаыс вӧлі ХVІІ нэмын нималана англияса саридзвуджысь Куклӧн.

1788ʼ восянь Австралия Англиялы лоис мыжа йӧзӧс ыстан инӧн. Тадзи локтісны сэтчӧ медводдза еджыд колонистъяс. ХІХ нэм шӧрын англичана босьтісны Австралияӧс ставнас. Первойсӧ овмӧдчисны сӧмын вадор пӧлӧныс, шӧрас овтӧминъяс пыр вӧлі сьӧкыд пырнысӧ да. Австралиялысь канму пытшсӧ туялігӧн лои пуктыны ловсӧ уна повтӧм ветлысь-мунысьяслы. 1862ʼ воын англияса Стюарт медводз муніс Австралия вомӧн лунвывсянь войвылӧ. 1922ʼ воын англичанин Уайт муніс Австралия вомӧн автомобильӧн лунвывса кар Аделаидасянь войвывса Дарвин портӧ.