Австралиялӧн му веркӧсыс быдлаті ӧткодьджык. Тайӧ — плавкӧс шыльыдін, кодлӧн дортіыс кыптыштӧма. Торъя ыджыд мусюръяс эмӧсь Австралия рытыввыв юкӧнын. Аслас тэчасногнас Австралия ёна мунӧ Лунвыв Африкалань, Индостанлань да Антарктидалань, кодъяскӧд, буракӧ, ёна важӧн вӧлӧма ӧтпомысь. Асывладорса джуджыдджык юкӧнас эмӧсь кӧрӧмӧн артмӧм гӧраяс — Австралияса Альпъяс, 2800 м-ысь джуджыдджыкӧсь. Австралияса Альпъяслӧн йывъясыс лым визьысь улынӧсь. Рытывладорӧ гӧраяслӧн пӧкатъясыс ньывкыдӧсь да муыс вуджӧ увтасінӧ. Торъя нин улыс местаяс эмӧсь увтасін асывладор бокас (Эйр ты 12 метрӧн саридз веркӧсысь улынджык).

Юяс Австралияын этша да ванас найӧ гӧльӧсь. Гожӧмын тшӧкыда косьмӧны да торъявлӧны ты чукӧръяс вылӧ. Зэра поводдя дырйи мукӧд каднас туӧны да ойдӧдӧны дас километръясӧн. Татшӧм юяссӧ шуӧны крикъясӧн, шуам, Купер-крик. Австралияын медыджыд ю — Муррей да сылӧн вожыс Дарлинг. Муррейӧд во гӧгӧр ветлӧны суднояс, а Дарлингӧд — сӧмын зэра кадӧ.