Австралия куйлӧ лунвыв мусярджынйын, сы вӧсна сэні вочӧжся кадъясыс абу миян кодьӧсь. Меджар тӧлысьыс сэні — январ, а медкӧдзыдыс — юль. Войвыв юкӧныс Австралиялӧн тропик поясын. Температураыс вылын да зумыд: торъялӧмыс медкӧдзыд да меджар тӧлысьяс костын 2‒4°-ысь абу уна. Зэр усьӧ уна, вонас 2 м-ӧдз. Зэрсӧ вайӧны войвывса гожся муссонъяс.

Австралия лунвылын климатыс тропикувса. Вогӧгӧрся шӧр температураыс 20-сянь 14°-ӧдз. Гожся да тӧвся температура костын торъялӧмыс тӧдчанакодь, медся нин материк шӧрас. Гожӧмын температура кайлӧ +50°-ӧдз, тӧлын лэччылӧ 5° кӧдзыдӧдз. Енэжваяс медуна усьлӧны асывладорын, кытчӧ васӧдсӧ вайӧ саридзсянь локтысь асыв-лунся пассатӧн. Кымын водзӧ рытывланьӧ, сымын этшаджык и этшаджык усьӧны енэжваясыс, сы вӧсна мый Ыджыд океанысь локтысь васӧдсӧ кутӧны гӧраяс.