Войвыв юкӧныс Австралияын век веж, васӧда тропик вӧр улын да саваннаяс улын. Австралия асыв-лунвылын быдмӧны век веж пуяс, унджыкыс эвкалиптъяс. Тайӧ пуясыс бура велалӧмаӧсь кос да жар климатас: вужъясыс налӧн кузьӧсь да вермӧны кыскыны васӧ му пытшкысь пыдысь; коръясыс налӧн пӧшти вертикальнӧя ӧшалӧны, сы вӧсна шонді югӧр на костӧд сӧмын исковтӧ да сы вӧсна эвкалипта вӧрын зэв югыд. Тайӧ пуясыс сэтшӧм шоча быдмӧны, мый вӧрыс парк кодь. Эвкалиптъяс кындзи Австралияын паныдасьлӧны и мукӧд пуяс: казуарина, туруна пу, акация, сулея пу, кодъяслӧн заыс польтчӧма бӧчка моз.

Материк шӧрас кос местаясын быдмӧны сутшкасьысь кустарникъяс, кодъяс артмӧмаӧсь ляпкыдик эвкалиптъясысь да акацияясысь. Тайӧ вӧраинсӧ шуӧны «скрубъясӧн». Сы пыр муннысӧ зэв сьӧкыд.

Рытыввыв Австралияӧс босьтӧма овтӧмин. Австралия шӧрын ыджыд местаяс кос степъяс улын. Тайӧ ыж видзан медшӧр мутасъяс. Му вӧдитысьяслы лоӧ муяссӧ торйӧн кӧтӧдны.

Аслас культура быдмӧгъяс Австралияын абу. Кыдзи нянь вайысь, сідз жӧ плодъяс вайысь быдмӧгъяс коркӧ вӧлі вайӧма Европаысь.

Австралияса пемӧсъясыс нӧшта нин ёна торъялӧны мукӧд му юкӧнса пемӧсъяс дорысь, быдмӧгъяс серти. Европеечьяс локтӧдз Австралияын унджыкыс вӧлі зепта пемӧсъяс. Налӧн рушкуладорас эм торъя зеп кодь, кӧні энь пемӧсыс новлӧдлӧ ассьыс пиянсӧ. Татшӧмъяснас лоӧны: кенгуру, зепта кӧин, зепта палюр да мукӧд.

Эмӧсь сідзжӧ мукӧд материкъясын важӧн нин бырӧм — кольк новлысь нёньӧдысьяс: ехидна да утканыр. Горт пемӧсъяс пиысь европеечьяс локтӧдз Австралияын вӧлі сӧмын пон динго.

Лэбачьяс пиысь австралияса вӧръясын паныдасьлӧны попугайяс, саваннаясын эму да «скруб»-ын — лирабӧж. Кодыр европеечьяс локтісны Австралияӧ, найӧ вайисны сьӧрсьыс зэв уна гортса пемӧсъясӧс: кроликъясӧс, ыжъясӧс, мӧсъясӧс да вӧвъясӧс.