Карта серти удж.

1. Висьталӧй, кӧні увтасъясыс паськыдджыкӧсь, — Войвыв али Лунвыв Америкаын.
2. Кутшӧм тіянлы тӧдса ыджыд увтас куйлӧ Лунвыв Америкаын?
3. Кутшӧм джуджыд гӧраяс нюжӧдчӧмаӧсь Лунвыв Америкаын Лӧнь океан вадор пӧлӧн?

Веркӧс. Веркӧс артмӧм сертиыс Лунвыв Америкалӧн эм уна ӧткодьлун Войвыв Америкакӧд. Кыкнан тайӧ материкыслӧн рытыввылас Лӧнь океан вадор пӧлӧн кыссьӧны джуджыд том гӧраяс, асыввылас — важся гӧраяс да гӧравывъяс, а материк шӧрас, юяс пӧлӧн, куйлӧны шыльыдінъяс. Но Войвыв Америка серти Лунвыв Америкалӧн веркӧсыс абуджык кыпалӧм. Тані ыджыд места босьтӧны увтасъяс.

Лунвыв Америка шӧр юкӧнас экватор дорын эм Амазонкаа увтас. Тайӧ — медся ыджыд увтас став му шар вылас. Сійӧ вевттьысьӧма тані вӧвлӧм саридзьяслӧн пуктӧсъясӧн да ю ваясъясӧн. Сысянь лунвылынджык — войвывсянь лунвылӧ нюжӧдчӧма Ла-Платаа увтас.

Материк асыввылын куйлӧ паськыд Бразилия гӧравыв, коді артмӧма важся изсикасъясысь. Сійӧ кыпалӧ асыв-лунвывлань да кыркӧтшӧн лэччӧ Атлантика океанлань.

Рытыввылас, Лӧнь океан вадор пӧлӧн, нюжӧдчӧмаӧсь Кордильера гӧраяс, кодъясӧс Лунвыв Америкаын шуӧны Андъясӧн. Андъяс — том да джуджыд гӧраяс. Найӧ джуджыдджыкӧсь Войвыв Америкаса Кордильераысь. Налӧн йывъясыс весиг экватор вылын вевттьысьӧмаӧсь некор сывлытӧм лымйӧн.

Вель уна йывъяс — кусӧм либӧ ловъя вулканъяс. Гӧраясын унаысь овлӧны мувӧрӧмъяс. Кӧнсюрӧ гӧра мусюръяс костын куйлӧны джуджыд платояс. Дзик лунвылас Андъяс вуджӧны Биа Му ді вылӧ.

Мупытшса озырлунъяс.
Лунвыв Америкаын эм уна перъянтор, но из шом этша.
Медся войвылас Караиб саридз дорын эм зэв уна мусир. Андъяс мутасын эмӧсь гырысь артмӧминъяс ыргӧнлӧн да озысьлӧн, а дзик Лӧнь океан дорын — селитра, коді мунӧ видз-му овмӧсын мувынсьӧданъяс вылӧ.
Атлантика океан вадор пӧлӧн, войвылын, эмӧсь бокситъяс — лемень металл шедӧдӧм вылӧ сырьё. Бразилия гӧраылын эмӧсь зэв гырысь куйлӧдъяс кӧрт рудалӧн, а сідзжӧ марганечлӧн — сэтшӧм металлӧн, коді мунӧ чугун да емдон сывдігӧн. Став тайӧ озырлунъяссӧ пӧшти ставнас босьтӧмаӧсь Америкаса Ӧтувтчӧм Штатъясса капиталистъяс.

Удж да могъяс.

1. Тӧдмалӧй карга серти Андъяслысь да Бразилия гӧравывлысь судтасӧ.
2. Пасъялӧй да гижӧй контур карта вылӧ тіянӧн велӧдӧм увтасъяс, гӧраяс да гӧравывъяс.
3. Контур карта вылӧ урчитӧм пасъясӧн гижалӧй мупытшса озырлунъяслысь артмӧминъяссӧ.