Мутас серти медся гырысь канмуяс Америкалӧн — Ӧтувтчӧм Штатъяс Америкалӧн (АӦШ) да Бразилия; кыкнан канмуыс торйӧн неунаӧн сӧмын ичӧтджыкӧсь став Европасьыс, но йӧз лыд сертиыс кыкнаныс ӧтлаын ёна сетчӧны сылы 18. Юркар США-лӧн — Вашингтон, а Бразилиялӧн — Рио-де-Жанейро.

Мукӧд канмуяс пытшкысь гырысьджыкыс квайт: Аргентина, Мексика, Перу, Боливия, Колумбия да Венесуэла; быд канму босьтӧ 1 млн. кв. км-ысь унджык. Ӧтлаын босьтӧмӧн мутасыс налӧн Европа ыджда, но олысь котырыс сэні 10 пӧв этшаджык — сӧмын 50 млн. Аргентиналӧн юркарыс — Буэнос-Айрес.

Асшӧр канмуясысь ӧтдор, Америкаын уна места босьтӧны империалист канмуяслӧн колонияяс: Аляска Войвыв Америкаын США-лӧн, да Лунвыв Америкаын Гвиана — колония, коді куим пельӧ юкӧма Англия, Нидерландъяс да Франция костын. США-сянь войвылын куйлӧ Англялӧн зэв ыджыд доминион Канада, мутас сертиыс сійӧ ыджыдджык весиг США-ысь, но йӧз лыд серти сетчӧ сылы кӧнкӧ 12 пӧв. Став канмуясын, кодъяс куйлӧны США-сянь лунвывлань, ыджыдалӧны роман кывъяс — испан да португал, а сы понда мый найӧ артмӧмаӧсь латынь кывйысь, то тайӧ канмуясыс шусьӧны Латыня Америкаӧн. Ставныс найӧ США, либӧ Англия ки улынӧсь.

Уджъяс карта вылын. Велӧдчӧй петкӧдлыны Америкаысь канмуяс да колонияяс; висьталӧй налысь юркаръяссӧ. Думыштӧй, быттьӧ ті лэбзянныд войвывсянь лунвылӧ аэроплан вылын Оттавасянь, Вежа Лаврӧ ю вылын, Буэнос-Айресӧ, Ла-Плата ю вылын; висьталӧй, кутшӧм канмуяс весьтӧд ті лэбанныд; висьталӧй саридзьяс да юяс, кутшӧмъясӧс аддзыланныд лэбиганыд.