Шӧркодь климат, а торъя нин кӧдзыдджык климата странаяс пӧвстын кӧдзыда-шоныда (климатическӧй) гӧгӧртасъясыс Европалӧн медбурӧсь. Тайӧ сы вӧсна, мый Гольфстримлӧн шоныд визулыс тані мунӧ войвылӧдз. Шоныд визувлӧн тӧдчӧмыс вуджӧ материкыслы, торъя нин сылы рытыввыв юкӧнас, кӧні тӧлӧны рытыв тӧвъяс. Рытыввыв берегын температураыс тӧвнас 20°-ӧн вылынджык норма дорсьыс. Гожӧмын Гольфстримлӧн шонтана влиянньӧыс оз и тӧдчы. Асыввывланьын Гольфстримлӧн тӧдчӧмыс чинӧ. Дунай кывтыдын сійӧ пӧшти оз нин тӧдчы.

Кыдзи му веркӧс тэчасног серти, сідз жӧ и климат серти, Европаӧс позьӧ юкны куим пельӧ: рытыввывса, асыввывса да лунвывса.

Климата картаясысь тыдалӧ, мый Рытыв Европалӧн саридзса небыд климат. Тӧвся температураыс 0°-ысь вылын. Гожӧмлӧн кузьтаыс 4 тӧлыссянь Скандинавия кӧдж вылын, да 8 тӧлысьӧдз Пиреней кӧдж рытыв-войын. Енэжваыс быдлаын усьӧ тӧдчана уна: 50 см унджык, а кӧнсюрӧ 1 м-ысь унджык вонас.

Асыввыв Европалӧн климатыс — материквывса, вося амплитудаыс 15° унджык, а дзик нин асыввылас 40° унджык. 0° улынджык температураа тӧвлӧн кузьтаыс содӧ асыввыв местаын (асыввылын во джынйӧдз да кузьджык). Енэжваыс вонас 50 см этшаджык, медся нин этша асыввылын да асыв-лунвылын.

Лунвыв Европаӧс кӧдзыд войтӧвъясысь сайӧдӧ гӧраяслӧн стеныс; лунвывланьӧд да шоныд саридзланьӧд сійӧ восьса. Мушӧр саридз берег пӧлӧнын небыд да дженьыд тӧв, да кузь да жар гожӧм. Неапольын январын 8°, а юльын 24° шоныд. Гожӧмыс кос. Зэр ёнджыкасӧ усьлӧ тӧлын. Торъя места Мушӧр саридз полосаын босьтӧ Пиреней кӧджлӧн шӧрыс. Тані кӧдзыдкодь материквыв климат, кӧть эськӧ и тӧлыс дженьыд, но гожӧмыс вывті мисьтӧм.