Асыввыв Европаын юясыс зэв кузьӧсь. Заводитчӧны найӧ неыджыд вывтасінъяссянь, пӧкатыс ичӧтик да сы вӧсна визувтӧны ньӧжйӧникӧн. Тайӧ бура отсалӧ суднояслы ва паныд ветлыны, да сыкӧд жӧ тшӧтш артмӧны ю вылас уна ляпкыдінъяс. Юясыс босьтӧны васӧ лымйысь, сы вӧсна тулысын ёна туӧны да петӧны берегысь, а гожӧмын ёна косьмӧны. Асыввыв Европаса юяс матыстчӧны мӧда-мӧд дінас йывъяснас да вожъяснас, мый вӧсна кокни вӧчавны каналъяс.

Рытыввыв Европаын юясыс дженьыдӧсь. Найӧ во чӧж васӧ босьтӧны зэрысь, сы вӧсна валӧн судтаыс пӧшти век ӧткодь. Судноясӧн позьӧ ветлыны дзик юяс йылӧдзыс. Торъя нин судноӧн ветлана юясӧн рытыввылын лоӧны: Сена, Рейн, Эльба да Темза юяс. Дунай аслас кузьтанас лоӧ рытыввывса юяссянь асыввыв юясӧ вуджанінӧн. Рытыввыв Европаын пӧшти став юсӧ мӧда-мӧдыскӧд ӧтлаалӧма каналъясӧн. Медся нин уна каналыс Ыджыд Бритму ді вылын (Англия), сідзжӧ Германияын, Бельгияын, Голландияын да Францияын.

Лунвывса юяс зэв дженьыдӧсь да визулӧсь, заводитчӧны джуджыд гӧраяс вывсянь. Судноӧн ветлыны найӧ оз туйны, но ёна коланаӧсь, кыдзи еджыд шом сетысьяс. Торъя нин уна гидростанцияясыс Альпъясысь визувтысь юяс вылын, кыдзи Рейн, Рона да По. Сідзжӧ эм уна гидростанцияяс Балтика массивса коськӧсь юяс вылын (Скандинавияын, Финляндияын да Карелияса АССР-ын).

Юясӧс ёна видзӧны и кӧтӧдӧм вылӧ, торъя нин Пиреней да Апеннин кӧджъясса кос степъясын.

Европаса тыяс, Каспий кындзи, абу гырысьӧсь. Каспий бӧрын медыджыд — Ладога ты, лоӧ сизимӧд местаын мусярвывса тыяс пиын. Унджык тыыс Европа войвыв джынйын да Альпъяс системаа гӧраяс дінын. Кыкнанлаас тайӧ тыясыс унджыкыс лоӧмаӧсь кыссян йи кад дырйи. Но эмӧсь и саридз колясысь артмӧм тыяс, именнӧ: Ладога, Онега да Скандинавия шӧрса тыяс, кодъя лоӧмаӧсь важ саридзса висъясысь. Каспий ты — паськыд саридзлӧн коляс, коді вӧлі ӧтлаасьӧ рытыввылын Сьӧд саридзкӧд да асыввылын Аралкӧд.

Медыджыд юяс да тыяс Европаын:
Асыввыв Европаса юяс: Печӧра, Войвыв Двина, Нева, Волхов, Свир, Рытыввыв Двина, Днестр, Днепр, Дон, Камакӧд да Окакӧд Волга, Урал.
Рытыввыв Европаса юяс: Висла, Эльба, Рейн, Сена, Рона, По, Дунай.
Европаса тыяс: Ладога, Онега, Женева, Каспий.