Мусина-быдмӧга зонаяс йылысь вӧлі нин водзынджык висьталӧма. Рытыввыв Европаын найӧ торъялӧм йылысь оз нин ков уна содтыны. Тшӧкыд вӧръяс тані кольӧма сӧмын Скандинавия кӧджын да Финляндияын. Водзынджык лунвылын важкадся вӧр бырӧма нин да сы местаӧ быдмӧ весалӧм, ки помысь пуктӧм вӧр. Мушӧр саридздорса канмуясын вӧръяс дзикӧдз бырӧдӧма и мортӧн, и ыж да кӧза стадаясӧн, кодъяс йирӧмӧн бырӧдӧны том петасъяссӧ да быдмысь пуяссӧ. Вӧр пыдди тані паныдасьлӧны сӧмын век ӧткодь веж кустарникъяс.

Вӧра местаяс пиысь унджыкыс да став степъясыс нянь быдмӧгъяс улын (лыа мусинъяс вылын — картупель) да техническӧй быдмӧгъяс улын, медся нин сакара свеклӧ улын. Войвылын нянь пиысь медъёна вӧдитӧны ид, зӧр да сю; Шӧр Европаын — шобді; лунвылынджык — кукуруза; Лунвыв Европаын медъёна кукуруза, сэсся шобді да киськалан муяс вылын — рис.

Шӧр Европаын, торъя нин лунвывланяс, вӧдитӧны виноград да садъяс, но медъёнасӧ тайӧ паськалӧма Мушӧр саридздорса канмуясын. Тані вӧдитӧны апельсин, лимон, мандарин, олива пу, коді сетӧ маслина. Паныдасьлӧны хлопок да сакара тростник плантацияяс. Кӧнсюрӧ (Лунвылын да Голландияын Войвыв саридз дорын) вель ыджыда паськалӧма дзоридз вӧдитӧм-быдтӧм.