Социалист сяма Сӧвет Республикаяслӧн Союз (СССР) босьтӧ Евразиялысь войвыв юкӧнсӧ, сэтчӧ пырӧны Европалӧн асыввыв джынйыс да Азиялӧн коймӧд юкӧныс (войвылыс).

СССР улын став мутасыс лыддьыссьӧ 21,3 млн. кв. км. ыджда. Став косіныс босьтӧ 149 млн. кв. км., сылӧн йӧзӧн овмӧдӧм юкӧныс, полюсдорса эрдъясӧс шыбитӧмӧн, лоӧ 134 млн. кв. км. ыджда. Сідзӧн, СССР вылӧ став овмӧдӧм косінсьыс воӧ ылӧсас ӧти квайтӧд юкӧныс.

Мутас ыджда серти СССР-ысь ыджыдджык сӧмын ӧти Брит империя, мӧд ног кӧ, Англия став аслас киподув муяснас, но Англиялӧн киподув муясыс вывті уна пельын, куйлӧны мушар пасьталаыс, мӧда-мӧдсьыс найӧ торъялӧмаӧсь океанъясӧн да политическӧя омӧля йитчӧмаӧсь; миян жӧ Союзным — ӧти ӧтторъя му да пролетариат диктатуранас политика боксянь сійӧ сэтшӧм топыда йитчӧма, кыдзи ни ӧти канму мирас. Став мукӧд канмуясыс, Брит империяысь кындзи, миян Союзысь ёна посньыдджыкӧсь. Весиг медгырысьясыс на пиысь, кыдзи шуам, АӦШ, Китай, Бразилия да Франция колонияяснас 2–2,5 пӧв ичӧтджыкӧсь СССР-ысь. Миян Союзлӧн медылі чутъясыс со кытӧнӧсь: рытыввылын (Польшакӧд суйӧрын) асыввыв кузьта 26° улын, асыввылын (Дежнёв нӧрыс) асыввыв кузьта 190° улын, лунвылын (Афганистанкӧд суйӧр дорын Кушка) войвыв пасьта 35° улын, войвылын (Челюскин нӧрыс) войвыв пасьта 77° улын.