Миян ыджыд чужан муным — Социалист сяма Сӧвет Республикаяслӧн Союз, мирын социалист сяма медводдза канму, босьтӧ Европалысь асыввыв джынсӧ да Азиялысь войвыв коймӧд юкӧнсӧ. Сӧвет Союзлӧн мутасыс 22 млн. кв. км сайӧ ыджданас. Тайӧ лоӧ став овмӧдӧм косінлысь квайтӧд кымын юкӧныс. Весиг гырысь канмуяс — АӦШ, Китай, Бразилия да Франция колонияяснас, — СССР-ысь ёна ичӧтджыкӧсь. Социалист сяма Сӧвет Республикаяслӧн Союз лоӧ ӧтторъя мутасӧн да политика боксянь сэтшӧм топыда йитчӧма, кыдзи абу йитчӧма мирын ни ӧти канму. Сӧвет Союз нюжӧдчӧма рытыввывсянь асыввылӧ 11 тыс. км ылнаӧ, а войвывсянь лунвылӧ — пӧшти 4500 км ылнаӧ. Союзлӧн медся рытыввыв чутыс — Балтика саридз дорын Калининград кар дінын асыввыв кузьта 20° улын, а медся асыввыв чутыс — Дежнёв нӧрыс Чукотка кӧджын рытыввыв кузьталӧн 170° улын. Кор Мӧскуаын войшӧр кад на, Дежнёв нӧрысын 10 час асыв нин. Медся войвыв чутыс — Челюскин нӧрыс Таймыр кӧджын войвыв пасьта 77° улын, а медся лунвыв чутыс — Кушка кар дорын Афганистанкӧд суйӧр вылын войвыв пасьта 35° улын.