Картаӧн удж:
1. Видзӧдлӧй СССР-лӧн физика мусерпас вылысь судтаяслысь шкала да корсьӧй медся джуджыд да медся ляпкыд местаяс.
2. Тӧдмалӧй карта серти, мый унджык миян канмуын: гӧраяс, вывтасъяс али увтасъяс.

Кор ті видзӧдланныд СССР-лӧн физика карта вылӧ, аддзанныд, кутшӧм абу ӧткодь Сӧвет Союзлӧн рельефыс.

Балтика саридз вадоръяссянь да рытыввыв суйӧрсянь Урал гӧраясӧдз шыльквидзӧ неыджыд вывтасъяса паськыд шыльыдін. Сійӧ шусьӧ Асыввыв Европаса либӧ Роч шыльыдінӧн.

Урал гӧраяс сайын Енисей юӧдз куйлӧ Рытыввыв Сибырса увтас, коді торъялӧ аслас шыльыд веркӧсӧн.

Лунвылын куйлӧ Туран увтас. Тані эмӧсь океан веркӧсысь улынджык местаяс.

Енисейсянь асыввылын Лӧнь океан вадоръясӧдз став тайӧ зэв ыджыд мутасын рельефыс тӧдчымӧн унапӧлӧсджык. Сэні эмӧсь и увтасъяс, и джуджыд тшӧтшкӧсінъяс, и быдкодь судта гӧраяс. Зэв ыджыд места босьтӧ Шӧр Сибырса тшӧтшкӧс вывтас.

Миян канму лунвылын да асыввылын эмӧсь джуджыд кыптӧдъяс да гӧра мусюръяс. Найӧ артмӧдӧны пӧшти оръявлытӧм гӧра лёдз. Ӧткымынлаын найӧ 7000 м-ысь джуджыдджыкӧсь саридз веркӧсысь.

Йӧзлӧн олӧм да уджалӧм вылӧ ыджыд тӧдчанлун имеитӧ сійӧ, кутшӧм мулӧн веркӧсыс. Миян канмуын медся уна йӧз олӧны шыльыдінъясын. Гӧраяс дорысь найӧ лӧсьыдджыкӧсь видз-му уджалӧм вылӧ, каръяс, индустрияса уджаинъяс лэптӧм вылӧ да туйяс вӧчӧм вылӧ. Гӧраӧсь районъясын тшӧкыдджыка овлӧны мупытшса озырлунъяс, сы вӧсна сэні ёнджыка перйӧны быдпӧлӧс рудаяс; гӧравыв видзьяс гожӧмын — зэв бур пӧскӧтинаяс ыжъяслы да гырысь скӧтлы.