Став Войвыв Азия Урал гӧраяссянь Лӧнь океанса саридзьясӧдз, Курила да Сахалин діяскӧд тшӧтш, Рытыввыв Азиялӧн юкӧн — Туран увтас, сыкӧд орчча гӧраяскӧд, да Кавказсай — ӧтув лоӧны СССР-лы Азияладор юкӧнӧн. Мутаслӧн ыджда сертиыс СССР-лӧн Азияладор юкӧн некымын пӧв ыджыдджык Европаладор юкӧнсьыс. А олысь йӧз лыд серти сійӧ ёна кольччӧ сыысь, сы вӧсна мый босьтӧ Сибырса тундралысь да тайгалысь, а сідзжӧ Шӧр Азияса овтӧминъяслысь этша йӧза эрдъяс.

Сар дырйи Роч мулӧн Азияладор юкӧн вӧлі канмулӧн вывті бӧрӧ кольӧм да нартитан ылі помӧн, сійӧ сетліс сырьё ёнджыка сӧвмӧм Европаладор юкӧнлы.

Сибырса вужвойтырӧс чорыда эксплуатируйтлісны купечьяс да сарлӧн чинаяс, налӧн эз вӧв гижӧд асланыс кывъяс вылын, найӧ вӧліны дорвыв грамотатӧмӧсь, олісны корысь олӧмӧн да вочасӧн бырисны.

Сӧвет власьт дырйи СССР-лӧн Азияладор юкӧнса войтыръяслӧн олӧмыс зэв ёна вежсис.

Роч мулӧн водзті бӧрӧ кольӧм юкӧнъясын ӧні лоины из шом перъян гырысь шахтаяс, перйӧны мусир да быдсяма рудаяс, заводъясын сывдӧны металлъяс, вӧчӧны сложнӧй машинаяс, кыпӧдӧны гырысь электростанцияяс, паськалӧ видз-му вӧдитӧм да скӧт видзӧм. Сӧвет Азияса войтыръяс пӧлучитісны ассьыныс гижӧд, велӧдчӧны школаясын асланыс чужан кыв вылын, лоины грамотнӧйясӧн. Найӧс оз нин нартитны да увтыртны, а лоины ӧні сӧвет войтыръяс семьяын тыр инӧдаӧсь.