Шонді югӧръяс шонтӧны океанлысь веркӧссӧ, та помысь ва пакталӧ да кайӧ атмосфераӧ. Атмосфераын ва ру кӧдзалӧ да пӧртчӧ ва войтъясӧ (конденсируйтчӧ). Ва войтъясысь да йи чиръясысь артмӧны кымӧръяс. Кымӧръясысь усьӧ зэр да лым, тадзи мыйтакӧ ва бӧр локтӧ океанӧ. Тӧвъяс нуӧны кымӧръяссӧ косін весьтӧ, кӧні наысь тшӧтш усьӧ зэр-лым. Енэжваыс мыйтакӧ йиджӧ му пытшкас, содтӧ мусинас васӧдлунсӧ да тыртӧ мупытшса ваяс, а мыйтакӧ визувтӧ юясӧ да мукӧд вааинъясӧ. Юяс чукӧртӧны васӧ мувывса ватасъясысь (тыяс, шоръяс, сылан йи визувъяс), а сідзжӧ мупытшса ваяс да бӧр нуӧны сійӧс мирса океанӧ. Океан веркӧссянь ваыс бара пакталӧ, да кытшыс океан — атмосфера — косін — океан пӧдлассьӧ.
Океанысь косінӧ да косінысь океанӧ валӧн дугдывтӧг вешъялӧм шусьӧ Мирса ва бергалӧмӧн.

Мирса ва бергалӧмлӧн пансян юкӧныс — океан, сы вӧсна, мый сы веркӧсысь ваыс пакталӧ, а сыӧ сылӧмторъяс кольӧны, атмосфераӧ сола океанысь локтӧ дуб ва. Океансянь косін весьтӧ кӧ эз волыны кымӧръяс, енэжва дугдіс эськӧ усьны косінӧ, вочасӧн сыысь бырис эськӧ став ваыс (пакталӧм да океанӧ визувтӧм помысь), а сідзкӧ и олӧм помасис.

Мирса ва бергалӧм оз сӧмын гидросфералысь разнӧй юкӧнъяс йит. Сійӧ йитӧ мӧда-мӧдныскӧд и Му шар став вевттьӧдсӧ: литосфера, гидросфера, атмосфера, биосфера.

Юалӧмъяс да уджъяс.

1. Мый сэтшӧм гидросфера? Кутшӧм юкӧнъясысь сійӧ тэчӧма?
2. Гидросфера кутшӧм юкӧнын медуна ва; медэтша ва?
3. Лыддьӧдлӧй косінса ваяс. Мый на пӧвстысь эм тіян оланін гӧгӧр?
4. Подулалӧй, мыйла гидросфера — Му шарлӧн орлытӧм ва вевттьӧд.
5. Шондісӧ шуӧны Мирса ва бергӧдысьӧн. Мыйла?
6. Индӧй став туй, кыті ваын бӧр локтӧ мирса океанӧ.
7. Гижӧй висьт океан веркӧсысь пакталӧм бӧрын ва войтлӧн ветлӧм-мунӧм йылысь.
8. Мирса ва бергалӧмкӧд йитӧм кутшӧм овланторъяс позьӧ видзӧдны тіян интасын?