Медводдза мугӧгӧртана мунӧмсӧ вӧчис мореплаватель Магеллан. 1519-ӧд вося сора тӧлысьын Магелланлӧн карабъясыс петісны Севилья портысь (Испания) да веськӧдчисны Америка берегъяслань. Сійӧ жӧ вося вӧльгым тӧлысьын Магелланлӧн карабъяс воисны Лунвыв Америка берегъяс дорӧдз да тайӧ берегъяс пӧлӧныс мӧдісны лунвылӧ. Тайӧ сьӧкыд да бурнӧй ветлӧмыс нюжаліс пӧшти во чӧж. 1520 вося йирым тӧлысьын Магелланлӧн карабъяс пырисны виямӧ (проливӧ), коді торйӧдӧ Биа Му діӧс Лунвыв Америкаысь. Тайӧ виямсӧ бӧрынджык вӧлі шуӧма Магеллан нимӧн. Виямӧд 22 лун кывтӧм бӧрын Магелланлӧн карабъясыс петісны Лӧнь океанӧ.

Водзӧсӧ карабъяс первой мунісны Америка берегъяс пӧлӧн, а сэсся кежисны рытыввылӧ. Океан вывті ветлӧмыс нюжаліс 4 тӧлысь чӧж. Тайӧ каднас сёян запасъяссӧ вӧлі ставсӧ нин бырӧдӧма, да путешественникъяслы лои зэв сьӧкыд. «Миян сёян сукаръясным, — гижӧ экспедицияса ӧти участник, — пӧрины бусӧ, кӧні веглясисны номыръяс. Ваыс, кодӧс ми юим, вӧлі гудыр да курыд. Медым не кувны тшыгла, миянлы ковмис сёйны кучик, кодӧн вӧлі эжӧма реяяс. Унаысь ковмыліс сёйны пильнӧй пызь да весиг крысаясӧс». Тайӧ 4 тӧлысь чӧжнас командасьыс кулі 19 морт. 1521-ӧд вося рака тӧлысьын экспедиция, бӧръяпом, воис Филиппинскӧй діясӧдз (Азия). Тані экспедицияыс сувтліс. Туземецъяскӧд ӧти косьын Магелланӧс виисны, но сылӧн судноясыс мунісны водзӧ рытыввылӧ. Уна выль кось да неудача бӧрын испанечьяс колины сэтшӧм этшаӧн, мый найӧ сотісны ӧти караб да тӧрӧдчисны кольӧм кык караб вылас. Тайӧ кык карабсьыс сӧмын ӧтиыс воис Испанияӧдз 1522-ӧд вося кӧч тӧлысьын. 265 морта командаысь бӧр воисны чужанінӧ сӧмын 17 морт. Татшӧм сьӧкыда шеді тайӧ медводдза мугӧгӧртана путешествиеыс. Но зато шедӧдӧмторъясыс ветлӧмыслӧн вӧліны зэв ыджыдӧсь: медводдзаысь йӧз гӧгӧртісны му сярсӧ. Медводдзаысь йӧз вуджисны Лӧнь океан. Тайӧ ветлӧм бӧрас быдӧнлы нин лои гӧгӧрвоана, мый Мулӧн формаыс зэв ыджыд сяр кодь, кодӧс позьӧ гӧгӧртны. Тайӧ жӧ ветлӧмыс сетіс Му ыджда йылысь стӧчджык тӧдӧмлун.