1925 вося гожӧмын Амундсен мӧдӧдчыліс аэропланӧн ветлыны войвыв мучӧрспомӧ, тӧдмавны, да эз во помӧдзыс. Сы бӧрын сійӧ эз шыбит юрсьыс сійӧ мӧвпсӧ, нӧшта ёнджыка кутіс лӧсьӧдчыны выльысь сэтчӧ ветлыны. Сэтчӧ лэблӧм вылӧ нарошнӧ вӧчисны Италияын зэв ыджыд лэбалан машина, «Норвегия» нима дирижабль. Сійӧ дирижабль вылас Амундсен шуис лэбны со кутшӧм туйӧд: Войвыв Норвегия, Шпицберген.

Войвыв мучӧрспом да Аляска.

Сэкся СССР-ӧ локтігкежлас дирижабльлы Салюзи сиктӧ, Ленинград дінын, нарошнӧ кыпӧдісны ыджыд ангар. Сэтчӧ сэсся воӧм бӧрас и сюйисны дирижабльсӧ.
Ода-кора тӧлысся 5-ӧд лунӧ, 1926-ӧд воын, дирижабль лэбӧма Салюзи сиктысь Шпицбергенӧ. Сэтчӧ сійӧ воӧма ода-кора 7-ӧд лунӧ. Шпицбергенын оліс 4 лун: виччысис бур поводдя. Ода-кора 11-ӧд лунын лэбис водзӧ войвыв мучӧрспомӧ. Ода-кора 12-ӧд лунын лэбис сійӧ войвыв мучӧрспом весьтті.
Нобиле, «Норвегия» нима дирижабльысь капитаныс, ыстӧма Римӧ радиограмма: «Меным сетӧм дӧрапасыд (знамяыд) ода-кора 12-ӧд лунсянь тӧлалӧ войвыв мучӧрспом йияс вылын».
Ода-кора 13-ӧд лунӧ дирижабль лэччис Аляскаӧ Теллер сиктӧ, рытыв-войвылын Ном нима карсянь.
Дирижабльыс Шпицбергенсянь Аляскаӧдз 70 час пыр мунӧма сувтлытӧг.
— Тайӧ лэбӧмыс вӧлі вӧт кодь, — гижӧ ассьыс мӧвпъяссӧ ӧти лэбалысь. — Татшӧм ылӧ некод на сувтлытӧг эз лэблы.