Мича рӧма енэж важысянь кыскӧ мортӧс ас дінас. Мортлы окота качӧдчывны вывлань, лэбалыштны сэні — пыдӧстӧм сынӧдын — мича лэбачьяс моз. Сы йылысь эм уна мойд, уна мойд кодь висьт. Морт вӧчалӧ мойд бордъяс, лэбалан ковёръяс, карабъяс.

1906-ӧд воӧ француз Сантос-Дюмон качӧдчис вывлань аслас вӧчӧм машина вылын. Тайӧ — став мир пасьтаын сынӧдӧ медводдза лэблӧм. Дюмон кутчысис сынӧдын сӧмын кымынкӧ секунд. Сэсся кымынкӧ тӧлысь мысти сійӧ мӧдысь качӧдчыліс, 200 метр вылнаӧ кайліс. Мӧд вонас сэсся лэбалісны нин Америкаын кык Райт вок. Найӧ олісны сынӧдын кымынкӧ минут.

Тадзи со морт заводитіс вермыны сынӧд. Вермис ӧд сійӧс, нӧшта ӧдйӧ. Ӧні морт киын зэв ыджыд буртор, кодӧн вермас сійӧ ӧдйӧ бурмӧдны ассьыс олӧмсӧ да веськӧдлыны ывла вылӧн.
Сынӧд вермӧма. Ветлысь-мунысьяслы, видласьысь-велӧдысьяслы воссис сэки выль туй. Налы позис пырны медпемыд пельӧсас му вылын, кытчӧ войдӧр некутшӧм туй эз вӧвлы, тӧдмавны, велӧдны гӧгӧрбок. Лэбигмоз найӧ вермисны быдлаті снимайтавны, сэсся наысь картаяс вӧчавны.