Петам кӧ ми шыльыд эрд вылӧ, сэк ас гӧгӧрысь аддзам зэв паськыд пространство; сійӧ шусьӧ енэжтасӧн (горизонтӧн). Миянлы кажитчӧ, быттьӧ ыліас муыс ӧтлаасьӧ енэжкӧд. Визьыс, кыті быттьӧ енэж ӧтлаасьӧ мукӧд, шусьӧ енэжтас визьӧн. Тайӧ визьыс круг формаа. Енэжтаслӧн визьыс быдласянь, кӧн кӧть ми ог лоӧ му вылын, тыдалӧ круг кодьӧн. Тайӧ висьталӧ, мый мулӧн формаыс мылькъя. Кымын вылӧ ми кутам кайны, сымын енэжтаслӧн площадьыс (пасьтаыс) мӧдас паськавны да енэжтаслӧн визьыс миян дінсянь кутас век ылысмыны и ылысмыны. Равнина (шыльыд эрд) вылын — степын — енэжтаслӧн визьыс кутас тыдавны 5 км сайын. Кор ми кутам кайны джуджыд гӧра вылӧ либӧ аэроплан вылынӧсь, сэк 100 метр вылнасянь енэжтас визьыс тыдалӧ 36 км сайын. Тадзи вочасӧн енэжтаслӧн паськалӧмыс бара жӧ висьталӧ, мый мулӧн вылысыс мылькъя. Плавкӧс кӧ вӧлі мулӧн вылысыс, сэк эськӧ вылӧ кайигӧн енэжтасыс вочасӧн эз паськав. Мулысь веркӧссӧ ми аддзам сӧмын ичӧтика, сы понда сійӧ миянлы кажитчӧ плавкӧсӧн. Мореӧ петысь паракод вылӧ бинокль пыр видзӧдігӧн аддзам, мый енэжтас сайӧ первой бердӧ паракодлӧн улысладорыс, сэсся шӧрыс, медбӧрын нин вылысладорыс. Тайӧ наблюдайтӧмъясыс сідзжӧ петкӧдлӧны, мый мулӧн веркӧсыс мылькъя.