Медводдза мугӧгӧртана ветлӧмсянь коли 400 воысь унджык. Уна экспедиция гӧгӧртліс Мусӧ быд туйвизьӧн море кузьта, косін кузьта да сынӧдті. Ӧні некод нин оз падъяв (оз сомневайтчы) сыын, мый Мулӧн формаыс сяр кодь. Мусӧ не сӧмын гӧгӧртлісны, но сідзжӧ и муртавлісны. ХVІІ нэмсянь заводитісны стӧча муртавны градуслысь кузьтасӧ, мӧд ног кӧ, 1/360 пайсӧ мусяр кытшлысь. Тайӧ мурталӧмъяс серти ми тӧдам, мый Мулӧн поперечникыс 12 000 км саяс да гӧгӧртасыс 40 000 км саяс. Бӧръя сё воӧ стӧч мурталӧмъяс петкӧдлісны, мый Муыс абу дзик сяр, а сэтшӧм сяр, коді полюсъяс дорӧдыс неуна топалыштӧма, лямалыштӧма. Тайӧ топалӧмыслысь ыдждасӧ позьӧ тӧдны татшӧм лыдпасъяс серти: Мулӧн полюсдорса радиусыс, мӧд ног кӧ, Му шӧрсянь полюсӧдз коластыс (ылнаыс) — 6357 км. Экваторса радиусыс, мӧд ног кӧ, Му шӧрсянь экваторӧдз ылнаыс — 6378 км. Экваторӧд Мулӧн гӧгӧртасыс — 40076 км. Меридианӧд Мулӧн гӧгӧртасыс — 40003 км. Сідзкӧ, экваторса да полюсдорса радиусъяс костын торъялӧмыс (разницаыс) 22 км. Медводдзаысь видзӧдлӧмӧн тайӧ торъялӧмыс чайтсьӧ зэв ыджыдӧн. Но ми кӧ эськӧ тайӧ торъялӧмсӧ мӧвпыштім петкӧдлыны чертёж вылын, сэк миян синным тайӧ торъялӧмсӧ эськӧ эз и казяв. Школаса дӧска вылӧ кӧ гижтыны мусярсӧ 60 см поперечникӧн (масштаб 1: 20 000 000), сэк полюсдорса радиусыс лоӧ 1 мм-ӧн дженьыдджык экваторсаысь. Мелӧн гижтӧм вӧсни визьлӧн кызтаыс 5 мм. Сідзкӧ, 1 мм торъялӧмсӧ мелӧн петкӧдлыны оз позь. Тайӧ торъялӧмсӧ оз позь петкӧдлыны и небӧгын чертёж вылын. Небӧгса чертёжыслӧн кӧ поперечникыс лоӧ 6 см, сэк полюсдорса да экваторса радиусъяс костын торъялӧмыс лоӧ 0,1 мм, мӧд ног кӧ, пӧшти вӧв си кызта.