Глобус — му шарлӧн модель, кодӧс ичӧтмӧдӧма уна миллион пӧв. Медым кивыв вӧлі вӧдитчыны глобуснас, му шарлы моделяс сюйӧма (воображаемӧй чӧрс пыддиыс) кӧрт чӧрс, кодӧс йитӧма подставка дінӧ. Ті тӧданныд, мый сэтшӧм экваторыс да меридианъясыс. Му вылын — тайӧ воображаемӧй визьяс, а глобус вылын тайӧ визьяссӧ нуӧдалӧма зэв ясыда да тӧлканог. Видзӧдлам бурджыка экватор вылӧ. Глобус вылын экваторсӧ юклӧма ӧтыджда юкӧнъяс вылӧ да быд юкӧн пыр нуӧдӧма меридианъяс. Меридианъяссӧ сідзжӧ юклӧма ӧтыджда юкӧнъяс вылӧ да быд юкӧн пыр нуӧдӧма сійӧ жӧ направлениеа визьяс, кыдзи и экватор. Тайӧ визьясыс шусьӧны параллельясӧн. Меридианъяс, кыдзи ми тӧдам нин, стӧча петкӧдлӧны веськӧдӧмсӧ (направлениесӧ) войвылӧ да лунвылӧ. Параллельяс сідз жӧ стӧча петкӧдлӧны веськӧдӧмсӧ рытыввылӧ да асыввылӧ. Меридианъяс да параллельяс глобус вылын артмӧдӧны тыв, коді шусьӧ градуса тывйӧн.