Веркӧс да пытшкӧс сертиыс Коми Республикалысь став мувывторсӧ позьӧ юклыны кык аслыспӧлӧс юкӧнӧ: ӧтиыс ― Сибыр Из бердын куйлӧ, мӧдыс ― Роч тшӧтшкӧсін вылын.

Тшӧтшкӧсін юкӧныс, бара, ачыс на торйӧдчӧ куим пельӧ.

Рытыввылас шевкнитчӧма Мозына-Эжваа шыльыдін; лунланьті тай сійӧ кыпалӧ Шӧрвыв мусюрӧн-а.

Асыввывті Мозына-Эжваа шыльыдінтӧ дорӧсалӧма Тиман мусюрӧн. Тайӧыс нюжвидзӧ Коми республикалӧн став му кузяыс лун-асыв-лунвывсянь вой-рытыв-войвывлань, а вой помнас пырӧ на и Яран кытшас.

Тиман мусюр, Сибыр Из да Баренц саридз костӧд, войланьыс сунтола шылькнитчӧма Печӧраа увтас.

Сибыр Из либӧ Урал нюжвидзӧ Коми Республика асыввыв суйӧр пӧлӧн. Коми республика му вылӧ рытладор баннаныс дзоргӧны сярйывса, сярйывдорса да войвыв Изъясыд.