Бара видзӧдлам глобус вылӧ. Экватор вылӧ бура видзӧдлӧмӧн сы вылысь ті аддзанныд лыдпасъяс 0, 15, 30, 45 да с. в. 180-ӧдз: лыдпасъясыс мунӧны асыввылӧ и рытыввылӧ. Вӧлӧмкӧ, тайӧ лыдпасъясыс петкӧдлӧны градусъяс. Быд 15° костын глобус вылын нуӧдӧма меридиан. Меридианыс, кодӧс нуӧдӧма 0° пыр, шусьӧ медводдзаӧн либӧ нуля меридианӧн. Сысянь градусъяссӧ лыддьӧмыс мунӧ асыввылӧ да рытыввылӧ. Нуля меридиансянь асыввылӧ (180°-ӧдз) ылнаыс, кодӧс петкӧдлӧма градусъясӧн, шусьӧ асыввыв кузьтаӧн (долгота), а рытыввылӧ — рытыввыв кузьтаӧн. Ӧні бурджыка видзӧдлӧй нуля меридиан вылӧ. Сы вылын тшӧтш сувтӧдалӧма градусъяс петкӧдлысь лыдпасъяс да быд 10° костын нуӧдӧма параллельяс. Градусъяссӧ лыддьӧмыс мунӧ параллельяс кузя экваторсянь полюсъясӧдз. Экваторсянь войвылӧ ылнаыс, кодӧс петкӧдлӧма градусъясӧн, шусьӧ войвыв пасьтаӧн (широта), а лунвылӧ — лунвыв пасьтаӧн. Пасьталысь градусъяссӧ лыддьӧмыс мунӧ 0°-сянь 90°-ӧдз. Войвыв да лунвыв пасьтаса 90° вылын куйлӧны полюсъяс.