Кытша (круговой) визьсӧ кӧ му веркӧс вывті нуӧдны кыкнан полюс пырыс, сэк Мусӧ сійӧ юкас кык мусярджын вылӧ: рытыввыв да асыввыв мусярджынъяс вылӧ. Тайӧ визьыслӧн быд джын йитӧ кыкнан полюссӧ. Визьыс, коді мунӧ му веркӧс вывті да йитӧ кыкнан полюссӧ, шусьӧ меридианӧн. Коми кыв вылын меридиан лоӧ луншӧр кадся визь. Тайӧ нимсӧ сетӧма сы вӧсна, мый сувтса ног сулалысь сюръясянь усьысь вуджӧрыс луншӧр кадын стӧч петкӧдлӧ меридианлысь нырвизьсӧ. Ми кӧ эськӧ вермим тайӧ вуджӧр кузяыс мунны войвылӧ, сэк эськӧ быть воим войвыв полюсӧ, а мунім кӧ лунвылӧ, сэк эськӧ воим лунвыв полюсӧ. Абу сьӧкыд гӧгӧрвоны, мый Му вылын меридианъяссӧ позьӧ нуӧдны мыйта колӧ, а экватор вермас лоны сӧмын ӧти.