Мирса мусярджынъя карта миянлы петкӧдлӧ Мулысь кык джын. Тайӧ карта серти сьӧкыд туявны океанъяссӧ. Сідзжӧ сьӧкыд орччӧдавны климатъясӧс, быдмӧга обласьтъясӧс, пасъявны саридзвыв туйяс. ХVІ-ӧд нэмын картограф Меркатор лӧсьӧдіс сэтшӧм мирса  карта, код вылӧ тӧрӧны став океанъясыс да материкъясыс. Видзӧдлӧй бурджыка тайӧ карта вылас да сійӧс ӧткодялӧй мусярджынъя картакӧд. Мусярджынъяс вылас, кыдзи и глобус вылын, став меридианыс ӧтлаасьӧны полюсъясын. Меркаторлӧн карта * вылын найӧс нуӧдалӧма параллельнӧя. Меридианъяссӧ тадзи серпасалігӧн, войвыв да лунвыв канмуясыс ёна паськалӧны пасьтанас. Збыльысь ӧд, 60° в. да л. пасьтаясын глобус вылын меридианъяс кост ылнаыс кык пӧв ичӧтджык, экваторын серти. А Меркаторлӧн карта вылын найӧ ӧткодьӧсь. Сідзкӧ, канмуясыс, кодъяс куйлӧны 60° в. да л. пасьтаясын, нюжалӧны тані рытыввывсянь асыввылӧ кык пӧв. Медым кольны тайӧ канмуяслысь лючки (збыль) доръяссӧ, Меркатор кык пӧв жӧ ыдждӧдіс и параллельяс костын ылнасӧ. Тадзикӧн канмуяслӧн доръясыс лоины колана ногаӧсь, а размеръясыс ыдждӧмаӧсь. Да и кымын ылын канмуыс экваторсянь, сымын ёнджыка ыдждӧдӧма сылысь ыдждаяссӧ.

Пример пыдди босьтӧй Австралия да Гренландия. Глобус вылын Австралия пӧшти куим пӧв ыджыдджык Гренландияысь. А Меркаторлӧн карта вылын Гренландия кык пӧв ыджыдджык Австралияысь. Тайӧ дзик гӧгӧрвоана сы вӧсна, мый Гренландия куйлӧ экваторсянь ылын, а та серти и ёнджыка нюжалӧма. Став висьталӧмсьыс тыдалӧ, мый Меркаторлӧн карта серти оз позь орччӧдавны канмуяслысь ыдждаяссӧ. Но нырвизьяссӧ да доръяссӧ тані петкӧдлӧма зэв лючкиа, колана нога. Та вӧсна Меркаторлӧн карта зэв кивыв саридзті ветлысьяслы. Карабъяслысь туйсӧ векджык пасъялӧны Меркаторлӧн карта серти.

* Лючкиджык эськӧ вӧлі шуны меркаторлӧн проекция картаӧн. Но кокньӧдӧм могысь ми пондам сійӧс шуны прӧста Меркаторлӧн картаӧн.