Йӧз важӧн нин казялісны, мый кадыс мукӧд интасъясын абу ӧткодь. Шонді югдӧдӧ ӧти здукӧ мулысь сӧмын ӧти джынсӧ. Миян кӧ 12 час лун, му мӧдар бокын, кытш джын, либӧ 180° сайын 12 час вой. Сідзкӧ, 180° вылӧ кад серти торъялӧмыс лоӧ 12 час, а 1° вылӧ — 4 минут. Тайӧ торъялӧмсӧ тӧдӧмӧн ми вермам тӧдмавны кад быд интаслы. Босьтам Вежа Петыр кар да Тифлис. Вежа Петыр кар асыввывса 30-ӧд меридиан вылын. Тифлис — асыввывса 45-ӧд меридиан вылын. Вежа Петыр кар Тифлиса кост 15°. Сідзкӧ, кадын торъялӧмыс Вежа Петыр кар да Тифлис костын лоӧ 4 мин. × 15 = 60 мин. либӧ 1 час. Мусерпас серти ми аддзам, Тифлис асыввылынджык Вежа Петыр кар серти. Сідзкӧ, Тифлисын кадыс лоӧ сёрджык Вежа Петыр карын дорысь. Вежа Петыр карын 12 час, а кымын час лоӧ Выль Орлеанын (Войвыв Америка)? Вежа Петыр кар асыввывса 30-ӧд меридиан вылын. Вежа Петыр карсянь Выль Орлеанӧдз костыс градус лыдӧн лоӧ 120°. 4 мин. × 120 = 480 мин. либӧ 8 час, сідзкӧ, Выль Орлеанын, коді Вежа Петыр карсянь рытыввылын кадыс 8 часӧн этшаджык Вежа Петыр карын дорысь. Шонді серти арталӧм кад шусьӧ инвыв кадӧн (местнӧйӧн).