Кад международнӧй счётлӧн медшӧрлуныс со мыйын. Му шарыс ставнас экватор кузя юксьӧ 24 пельӧ. Сідзкӧ, быд татшӧм юкӧнын лоӧ 15°. Водзӧ юклӧмъяс пырыс нуӧдалӧны меридианъяс. Тайӧ меридианъясыс став му веркӧссӧ юкасны 24 ӧткодь вӧнь вылӧ. Быд вӧнь шӧрӧд нуӧдӧны ӧти подув меридиан. Гӧгӧрвоана, мый быд подув меридианлӧн кадыс орчча подув меридиан кадысь торъялӧ стӧч 1 часӧн. Быд вӧнь пытшкын кадыс артавсьӧ тайӧ вӧньясса подув меридиан серти. Татшӧм ногӧн, му веркӧс вылын артмӧ 24 вӧнь, и быд вӧньлӧн кадыс орчча вӧньясса кад серти торъялӧ стӧч 1 часӧн. Часӧвӧй вӧньясӧс тадзи юклігӧн кокни артавны любӧй вӧньлысь кадсӧ, тӧдса кӧ миянлы кӧть ӧти вӧньлӧн кадыс. Арталӧмыс нуӧдсьӧ асыввылӧ нуля вӧньсянь, кодлӧн подув меридианыс мунӧ Лондон бердса Гринвичса обсерватория пыр.