Интаслӧн пасьтаыс тӧдмавсьӧ енэжтассянь небеснӧй светилӧяс (Шонді, кодзувъяс да мук.) судта серти. Босьтам медся кокни видлӧгсӧ. Енэжын эм Юрйыв кодзув. Сійӧ сулалӧ войвыв полюс весьтын, пӧшти му чӧрс продолжение вылын, сы вӧсна и сійӧ кажитчӧ миянлы дзик вӧрзьывтӧмӧн. Ми кӧ сувтам войвыв полюс вылӧ, сэк Юрйыв кодзув лоас миян юр весьтын. Ми кӧ полюссянь пондам мунны экваторлань, сэк Юрйыв кодзулӧс кутам аддзыны век улысьджык и улысьджык. Кымын ылӧ ми мунам полюссянь, сымын улынджык лоӧ Юрйыв кодзулыс. Ми кӧ лоам экватор вылын, сэк Юрйыв кодзулыс лоас дзик енэжтасас. Аслыспӧлӧс пельӧс мурталан инструмент отсӧгӧн йӧз тӧдмалӧны кодзувъяслысь судтасӧ енэжтассянь, мӧд ногӧн кӧ, тӧдмалӧны, кымын градус сійӧ пельӧсыслӧн, коді артмӧ кодзувсянь усян югӧрӧн да водса тшӧтшкӧслӧн. Полюс вылын тайӧ пельӧсыс пӧшти 90°, экватор вылын — 0°. Экваторсянь полюслань нырвизь кузьта тайӧ пельӧсыс вочасӧн пондас ыдждыны. Шуам, ми мунам караб вылын да кӧсъям тӧдмавны пасьтасӧ сійӧ инлысь, код вылын сулалам тайӧ каднас. Тӧдмалам Юрйыв кодзувлысь судтасӧ. Шуам, судтаыс 40°. Гӧгӧрвоана, мый ми сулалам 40° в. п. гӧгӧрын. Интаслысь пасьтасӧ позьӧ тӧдмавны быд мукӧд кодзув серти дай Шонді серти, сӧмын арталӧмъясыс лоасны тӧдчымӧнъя сьӧкыдджыкӧсь да дзугаджыкӧсь.