Му вылын интаслысь кузьтасӧ тӧдмалӧм могысь колӧ тӧдны татчӧс кад да нуля меридиан кад костын торъялӧмсӧ. Кыдзи тӧдмалӧны татчӧс кад, ми тӧдам. Интаслысь кузьтасӧ тӧдмалӧм эм сылы мӧдара задача. Босьтам видлӧг. Нуля меридианын тайӧ здукын 12 час лун. Кутшӧм градуса кузьтаын ми сулалам, сійӧ жӧ здукас кӧ миянын татчӧс кад серти 5 час рыт (17 час)? Быд 4 минута вылӧ кадын торъялӧм равняйтчӧ 1° вылӧ кузьтаын торъялӧмлы. Миян видлӧгын кад серти торъялӧмыс 5 час (либӧ 300 минута). 5 чассӧ (300 минута) юкам 4 вылӧ да лоӧ 75. Гӧгӧрвоана, мый сулалам 75° кузьта вылын. Кутшӧм кузьтаын: асыввылын али рытыввылын? Абу сьӧкыд гӧгӧрвоны, мый кузьтаыс лоӧ асыввывса, сы вӧсна мый миянын кадыс ёна сёрджык нуля меридианын серти.