Шонді лоӧ став система шӧрас. Шондіыд — зэв ыджыд шар: пӧшти 1300000 пӧв ыджыдджык му сярысь. Сійӧ югдӧдӧ да шонтӧ, сы вӧсна мый веркӧсладорыс сылӧн доналӧма 5–6 сюрс градуса температураӧдз, а шонді шӧрланяс температураыс нӧшта на кыптӧ да воӧ вывті вылӧдз (кымынкӧ миллион градусӧдз). Татшӧм температура дырйиыд ни ӧти тыртантор шонді вылын оз вермы лоны чорыдӧн: сійӧ либӧ кизьӧрмӧма-сылӧма, либӧ лоӧ газа состоянньӧын. Шонді сярлӧн турасыс (объёмыс) 1305 сюрс пӧв ыджыдджык му сяр объём дорысь. Шондіын сэтшӧм жӧ тыртанторъяс, кутшӧм и муын. Шонді вылын эм кӧрт, ыргӧн да мукӧд металлъяс. Мусянь шондіӧдз зэв ылын — 149.500.000 км. Шонді вылын тыдалӧны пятнӧяс. Найӧ мыччысьӧны шонді вылын асывладор бокас да 12‒13 суткиӧн вуджӧны шуйгаладорас. Та бӧрын пятнӧяс да дыра кад кежлӧ жӧ вошлӧны, сэсся бара мыччысьӧны асывладор бокас. Тыр кытшсӧ тайӧ пятнӧясыс вӧчӧны 25 сутки гӧгӧр. Сідзкӧ, 25 сутки чӧжӧн шонді бергӧдчӧ аслас чӧрс гӧгӧр. Ас дінас кыскан вынӧн (притяженньӧӧн) шонді кутӧ ас бердас, оз лэдз сійӧс лэдзны помтӧм ылдӧсӧ.