Шонді гӧгӧр, сідз жӧ кыдзи и му, кытшлалӧны нӧшта кӧкъямыс небеснӧй телӧ — планетаяс. Найӧ абу ӧтылнаынӧсь шондісянь: ӧтияс — ылынджыкӧсь му серти, мукӧдыс — матынджыкӧсь сыысь. Став планетаыс 9: Меркурий, Венера, Му, Марс, Юпитер, Сатурн, Уран, Нептун, Плутон. Ми аддзам планетаястӧ енэжысь сідзи жӧ, кыдзи и кодзувъясӧс. Кодзувъясысь планетаяс торъялӧны сійӧн, мый найӧ оз дзирдавны асланыс югыдӧн, а югдӧдсьӧны шонді югӧръясӧн. Найӧ миян дінӧ ёна матынджыкӧсь кодзувъяс сертиыд, сы понда вына подзорнӧй трубаяс пыр видзӧдігӧн ми аддзам кодзувъястӧ дзирдалан чутъяс кодьӧн, а планетаястӧ — гӧгыльяс кодьӧн. Рытын, шонді лэччӧм бӧрын регыд мысти, рытыввылын рытъя кыа югӧръяс костті тыдавлӧ дзирдалан югыд планета; мукӧддырйиыс сійӧ жӧ тыдавлӧ и водз асылын, шонді петӧм водзвылын, енэж асыввыв бокын. Тайӧ планетасӧ векджык шуӧны «рытъя кодзулӧн» либӧ «асъя кодзулӧн». Наукаын тайӧ планетасӧ шуӧны Венераӧн. Планетаяс, му моз жӧ, кытшлалӧны шонді гӧгӧр да быд планета ӧттшӧтш бергалӧ аслас чӧрс гӧгӧр. 

Олӧм вермас лоны, му вылын кындзи сӧмын Марс вылын, сэні эм ва да и сынӧд. Шонді, планетаяс, тӧлысь да мукӧд спутникъяс ставыс ӧтлаӧ босьтӧмӧн шусьӧны шонді системаӧн.