Ми аддзам енэжысь югыд тӧлысьӧс. Тӧлысьыд — мукӧдкӧд орччӧдӧмӧн, неыджыд телӧ. Сійӧ став мукӧд енэжса телӧясысь матынджык мулань, сы вӧсна и тыдалӧ миянлы ыджыд кытш кодьӧн. Тӧлысь — кӧдзыд телӧ да войясын югъялӧ сӧмын шонді югӧръяс отсӧгӧн, кодъяс югдӧдӧны тӧлысьсӧ. Тӧлысь бергалӧ му гӧгӧр, та вӧсна и сійӧс шуӧны мулӧн спутникӧн. Сійӧ кытшовтӧ му гӧгӧр 29½ суткиӧн. Тураснас тӧлысь 50 пӧв ичӧтджык му сяр дорысь, но сійӧ миян му дінын медматын да кажитчӧ, быттьӧ мукӧд светилӧяс дорысь ыджыдджык. Му сярсянь тӧлысьӧдз костыс 380.000 км гӧгӧр. Ва да сынӧд абутӧмла сэні дзик некод оз вермы овны. Телескоп пыр тӧлысьлӧн веркӧсыс бура тыдалӧ. Сэні эмӧсь гырысь гуранъяс да мылькъяс, кодъяс прӧстӧй синмӧн видзӧдігӧн кажитчӧны пемыд печатъясӧн. Тайӧ — джуджыд гӧраяс, кытчӧ инмӧ шонді да кодъяссянь усьӧ вуджӧр шыльыд инӧ.